నీ 'కీర్తి' బంగారంగానూ!
- IndiaGlitz, [Friday,August 10 2018]
చంద్ర‌ముఖిలో ఓ డైలాగ్ ఉంటుంది. చూడు.. పూర్తిగా చంద్ర‌ముఖిగా మారుతున్న గంగ‌ను చూడు.. అని. ర‌జ‌నీకాంత్ చెప్పే ఆ డైలాగును ఇప్పుడు కీర్తి సురేశ్ ఉన్న చోట బ్యాక్‌గ్రౌండ్‌లో వాడుకోవ‌చ్చేమో. ఈ భామ న‌టించిన 'మ‌హాన‌టి' ఎంత పెద్ద హిట్ అయిందో తెలిసిందే. ఆ సినిమాలో అయితే ఏకంగా సావిత్రిలాగా జీవించేసింది కీర్తి సురేశ్. ఆ చిత్రం షూటింగ్ స‌మ‌యంలో సావిత్రి గురించి ఎన్నో విష‌యాల‌ను తెలుసుకున్నార‌ట కీర్తి. అందులో కొన్నిటినైనా ఫాలో కావాల‌ని అనుకుంటున్న‌ట్టు ఆ మ‌ధ్య ఆడియో వేడుక‌లోనే తెలిపారు. ఇప్పుడు వాటిని నిజం చేస్తూ అంద‌రినీ ఆశ్చ‌ర్య‌ప‌రుస్తున్నారు.
తాజాగా ఈ అమ్మ‌ణి న‌టించిన సినిమా 'సండైకోళి2'. విశాల్ స‌ర‌స‌న న‌టించారు కీర్తి. ఈ సినిమాకు సంబంధించి త‌న ఆఖ‌రి రోజు షూటింగ్‌ను పుర‌స్క‌రించుకుని కీర్తి చిత్ర యూనిట్ అంద‌రికీ బంగారు నాణాల‌ను పంచిపెట్టార‌ట. దాంతో యూనిట్ అంద‌రూ తెగ మురిసిపోయి 'బంగారంలాంటి మ‌న‌సు' అని మెచ్చుకున్నార‌ట. ఈ సినిమాను తెలుగులోనూ విడుద‌ల చేయ‌నున్నారు. ఇందులో శ‌ర‌త్‌కుమార్ త‌న‌య, విశాల్ ఫ్రెండ్ వ‌ర‌ల‌క్ష్మి శ‌ర‌త్‌కుమార్ నెగ‌టివ్ రోల్ ప్లే చేస్తున్నారు. లింగుస్వామి ద‌ర్శ‌క‌త్వం వ‌హిస్తున్నారు.