నటసింహం నందమూరి బాలకృష్ణలో సరికొత్త యాంగిల్ చూపించిన అన్‌స్టాపబుల్ విత్ NBK టాక్ షో ఎంత పాపులర్ అయిందో ప్రత్యేకంగా చెప్పనక్కర్లేదు. ఓటీటీలో ఏ టాక్‌ షోకు రాని రికార్డులు ఈ షోకు వచ్చాయి. ఇప్పటికే రెండు సీజన్లు పూర్తి చేస్తున్న ఈ షో మూడవ సీజన్‌ త్వరలోనే ప్రారంభం కానుంది. ఈ మేరకు ఆహా సంస్థ క్లారిటీ ఇస్తూ అధికారికంగా ట్వీట్ చేసింది. "నిజమే మీరు విన్నది.. బాప్ ఆఫ్ ఆల్ టాక్ షోస్ అన్‌స్టాపబుల్ విత్ NBK మళ్లీ రానుంది. కానీ ఈ సారి లిమిటెడ్ ఎడిషన్స్‌తో మాత్రమే" అని తెలిపింది. ఎన్నికల సీజన్ కావడంతో ఈ సీజన్‌లో తక్కువ ఎపిసోడ్‌లు ఉండే మాత్రమే ఉండనున్నాయి.

సీజన్ 1, సీజన్‌ 2లతో ప్రేక్షకులకు ఫుల్ ఎంటర్‌టైన్మెంట్..

ఆహా వేదికగా అన్‌స్టాపబుల్ విత్ NBK సీజన్ 1, సీజన్‌ 2లో ప్రసారం అయిన 20 ఎపిసోడ్స్ గ్రాండ్ సక్సెస్ అయ్యాయి. ఎవరూ ఊహించని విధంగా, ఏ షోకు రాని విధంగా సెలబ్రెటీలు, రాజకీయ ప్రముఖులు ఈ షోకు వచ్చారు. మాజీ ముఖ్యమంత్రులు చంద్రబాబు, కిరణ్ కుమార్ రెడ్డితో పాటు స్టార్ హీరోలు పవన్ కళ్యాణ్, మహేష్ బాబు, ప్రభాస్, రవితేజ, అల్లు అర్జున్, నాని, గోపిచంద్ లాంటి వారే కాకుండా యువ హీరోలు శర్వానంద్, రానా, విశ్వక్ సేన్, సిద్ధూ జొన్నలగడ్డ లాంటి వారు కూడా పాల్గొని ప్రేక్షకులకు ఫుల్ ఎంటర్‌టైన్మెంట్ ఇచ్చారు.

మెగాస్టార్ చిరంజీవి రావాలని కోరుకుంటున్న నెటిజన్లు..

ఈ షోకి సీజన్ 3 కూడా ఉంటుందని కొద్దికాలం నుంచి వార్తలు వస్తూనే ఉన్నాయి. తాజాగా దీనిపై క్లారిటీ ఇస్తూ బాలయ్య బాబుతో అన్‌స్టాపబుల్ సీజన్ 3 ఉందని ఆహా ఓటీటీ ప్రకటించింది. దీంతో ఈ షోలో ఎలాంటి సెలబ్రెటీలు, రాజకీయ ప్రముఖులు వస్తారో అనే దానిపై నెటిజన్లు చర్చించుకుంటున్నారు. ఈ టాక్ షో ప్రారంభమైన దగ్గరి నుంచి మెగాస్టార్ చిరంజీవి వస్తారనే ప్రచారం జరిగింది. తొలి రెండు సీజన్లకు రాలేకపోయిన చిరంజీవి కనీసం ఈ సీజన్లో అయిన వస్తారేమోనని ఆశిస్తు్న్నారు. ఆయన వస్తే మాత్రం చిరును బాలయ్య ఇంటర్వ్యూ చేయడం రికార్డులు సృష్టించడం ఖాయమని అంటున్నారు.