உலக நாயகன் கமல்ஹாசன் அரசியல் பணிகளுக்கு இடையே 'விஸ்வரூபம் 2' படத்தின் பணிகளையும் கவனித்து வரும் நிலையில் அவரது நடிப்பில் ஷங்கர் இயக்கவுள்ள 'இந்தியன் 2' திரைப்படத்தின் படப்பிடிப்பும் விரைவில் தொடங்கவுள்ளது.

இந்த படத்தின் புரமோஷன் நிகழ்ச்சி தாய்லாந்தில் சமீபத்தில் நடந்தது. இதில் கலந்து கொண்ட இயக்குனர் ஷங்கர், இந்தியன் 2' பலூனை பறக்கவிட்டார் என்பதும் தெரிந்ததே

இந்த நிலையில் இந்த படத்தின் ஆரம்பகட்ட பணிகள் தொடங்கிவிட்டதாகவும் குறிப்பாக இந்த படத்தின் நாயகி கேரக்டருக்கு லேடி சூப்பர் ஸ்டார் நயன்தாராவை நடிக்க வைக்க முயற்சிகள் நடந்து கொண்டிருப்பதாகவும் செய்திகள் வெளிவந்துள்ளது.

ரஜினி, அஜித், விஜய் உள்ளிட்ட அனைத்து முன்னணி நடிகர்களுடனும் நடித்துவிட்ட நயன்தாரா, கமலுடன் மட்டும் நடிக்காமல் இருந்தது ஒரு குறையாக இருந்த நிலையில் இந்த செய்தி உண்மையானால் அதுவும் நிறைவேறிவிடும் என்பது குறிப்பிடத்தக்கது.