తెలుగులో న‌య‌న‌తార జోష్ ఈ మ‌ధ్య‌కాలంలో బాగా త‌గ్గింద‌నే చెప్పాలి. అయితే త‌మిళంలో మాత్రం ఆమె హ‌వా మాములుగా లేదు. ఇంకా చెప్పాలంటే అక్క‌డ ఆమెని ఓ క్వీన్‌లా ట్రీట్ చేస్తున్నారు అక్క‌డి జ‌నాలు. దానికి త‌గ్గ‌ట్టే న‌య‌న‌.. ఇటీవ‌ల రెండు బ్యాక్ టు బ్యాక్ బంప‌ర్ హిట్స్‌ని సిల్వ‌ర్ స్క్రీన్ సాక్షిగా ఓన్ చేసుకుంది. అందులో ఒక‌టి.. జ‌యం ర‌వి హీరోగా అత‌ని సోద‌రుడు మోహ‌న్ రాజా ద‌ర్శక‌త్వంలో రూపొందిన త‌ని ఒరువ‌న్ ఒక‌టి కాగా.. మ‌రోటి త‌ను ప్ర‌ధాన పాత్ర‌లో న‌టించిన మాయ (ఇదే సినిమా తెలుగులో మ‌యూరిగా రిలీజైంది).

ఈ రెండు చిత్రాలు సంచ‌ల‌న విజ‌యాల‌ను త‌మిళ‌నాట న‌మోదు చేసుకున్నాయి. ఈ నేప‌థ్యంలో న‌య‌న నుంచి వ‌చ్చే త‌దుప‌రి చిత్రం గురించి కోలీవుడ్ వ‌ర్గాలు ఆస‌క్తిగా ఎదురుచూస్తున్నాయి. విజ‌య్ సేతుప‌తితో న‌టిస్తున్న నానూమ్ రౌడీదాన్‌, జీవా స‌ర‌స‌న న‌టిస్తున్న తిరునాళ్‌, శింబు ప‌క్క‌న జ‌త‌క‌ట్టిన ఇదు న‌మ్మ ఆళ్‌.. ఇలా న‌య‌న న‌టించిన‌ చిత్రాలు దాదాపు చిత్రీక‌ర‌ణ పూర్తిచేసుకున్నాయి.

వీటిలో ఏ చిత్రం ముందుగా తెర‌పైకి వ‌స్తుందో దానికి మాత్రం ప్రారంభ వ‌సూళ్లు.. న‌య‌న‌తార పుణ్య‌మా అని క‌చ్చితంగా బావుంటాయ‌ని కోలీవుడ్ ట్రేడ్ పండితులు జోస్యం చెబుతున్నారు. మొత్త‌మ్మీద ఇప్పుడు న‌య‌న‌తార పేరు కె టౌన్‌లో తార‌క మంత్రంలా ప‌నిచేస్తోంద‌న్న‌మాట.