தளபதி விஜய் நடிப்பில் அட்லி இயக்கவுள்ள 'தளபதி 63' படத்தின் அறிவிப்பு கடந்த சில நாட்களுக்கு முன் அறிவிக்கப்பட்டு இந்த படத்தின் ஆரம்பகட்ட பணிகள் தொடங்கப்பட்டது. இந்த படத்திற்கு ஏ.ஆர்.ரஹ்மான் உள்பட 'மெர்சல்' படத்தின் தொழில்நுட்ப கலைஞர்கள் மீண்டும் இணைகின்றனர் என்பதை ஏற்கனவே பார்த்தோம்

இந்த நிலையில் ரசிகர்கள் மிகவும் ஆவலுடன் எதிர்பார்த்த இந்த படத்தின் நாயகி குறித்த அறிவிப்பு தற்போது வெளிவந்துள்ளது. ஆம், லேடி சூப்பர் ஸ்டார் நயன்தாரா தான் இந்த படத்தின் நாயகி என அதிகாரபூர்வமாக அறிவிக்கப்பட்டுள்ளது.

இந்த படத்தின் தயாரிப்பு நிறுவனமான ஏஜிஎஸ் சற்றுமுன் தனது சமூக வலைத்தளத்தில் இந்த படத்தில் நாயகிக்கு மிகவும் வலிமையான கேரக்டர் என்றும், இந்த கேரக்டருக்கு நயன்தாராவை தேர்வு செய்துள்ளோம் என்றும் நீண்ட இடைவெளிக்கு பின் விஜய்-நயன்தாரா ஜோடி ரசிகர்களுக்கு நல்ல விருந்தாக இருக்கும் என்றும் அறிவித்துள்ளார்.

அட்லி இயக்கிய முதல் படமான 'ராஜா ராணி' படத்தின் நாயகி நயன்தாரா தான் என்பதும், கடந்த 2009ஆம் ஆண்டு வெளிவந்த 'வில்லு' படத்திற்கு பின்னர் மீண்டும் விஜய்யுடன் நயன்தாரா இணைகிறார் என்பதும் குறிப்பிடத்தக்கது.