‘లూసీఫర్’ రీమేక్‌లో నయనతార..! ఆసక్తికర విషయం ఏంటంటే..
- IndiaGlitz, [Friday,February 19 2021]
ప్రస్తుతం కొరటాల శివ దర్శకత్వంలో 'ఆచార్య' చేస్తున్న మెగాస్టార్ చిరంజీవి త్వరలోనే తన తర్వాతి సినిమాను పట్టాలెక్కించబోతున్నారు. మలయాళంలో మోహన్‌లాల్ ప్రధాన పాత్రలో నటించిన అద్భుత విజయం సాధించిన ‘లూసిఫర్’ సినిమాను తెలుగులోకి రీమేక్ చేస్తున్నారు. మెగాస్టార్ చిరంజీవి హీరోగా తెరకెక్కనున్న ఈ సినిమాకు తమిళ దర్శకుడు మోహన్ రాజా దర్శకత్వం వహిస్తున్నారు. ఈ సినిమాలో కీలక పాత్ర కోసం నయనతారను దర్శకుడు ఫిక్స్ చేసినట్టు సమాచారం.
ఆసక్తికర విషయం ఏంటంటే.. ఈ సినిమాలో మెగాస్టార్‌కు నయనతార సోదరిగా నటించనుంది. ఈ చిత్రంలో హీరో సోదరి పాత్ర అత్యంత కీలకం. ఆ పాత్ర కోసం పలువురు ప్రముఖ కథానాయికలను పరిశీలించిన దర్శకనిర్మాతలు చివరికి నయనతారను ఎంచుకున్నట్టు సమాచారం. నయన్ కూడా ఆ పాత్ర చేయడానికి అంగీకరించినట్టు సమాచారం. ప్రస్తుతం ఆమె భర్త పాత్ర పోషించే నటుడి విషయంలో చర్చలు జరుగుతున్నట్టు తెలుస్తోంది.
ఆ పాత్ర పోషించే నటుడి పేరు కూడా కన్ఫామ్ అయ్యాక ఈ సినిమాలో నటీనటుల గురించి అధికారిక ప్రకటన వస్తుందట. మలయాళంలో అయితే ఈ సినిమాలో హీరోయిన్ లేదు. కానీ తెలుగు రీమేక్‌లో మాత్రం ఉంటుందని సమాచారం. అలాగే తెలుగు నేటివిటీకి తగినట్టుగా సినిమాలో మార్పులు చేర్పులు సైతం చేయబోతున్నట్టు తెలుస్తోంది. మార్చి నెల నుంచి ఈ సినిమా సెట్స్ మీదకు వెళ్లబోతున్నట్టు సమాచారం.