2ஆம் பாகமாக உருவாகவுள்ள நயன்தாராவின் சூப்பர் ஹிட் படம்
- IndiaGlitz, [Saturday,November 10 2018]
கோலிவுட் திரையுலகின் நாயகர்களான ரஜினி, கமல் முதல் பல நடிகர்கள் தாங்கள் நடித்த சூப்பர் ஹிட் படங்களின் இரண்டாம் பாகங்களில் நடித்து கொண்டிருக்கும் நிலையில் தற்போது நடிகை நயன்தாரா நடித்த வெற்றிப்படம் ஒன்று இரண்டாம் பாகமாக உருவாகவுள்ளது.
கோபி நயினார் இயக்கத்தில் நயன்தாரா மாவட்ட ஆட்சி தலைவராக நடித்த 'அறம்' படத்தின் இரண்டாம் பாகம் உருவாகவுள்ளதை கோபி நயினார் தற்போது உறுதி செய்துள்ளார். இந்த படத்தின் இரண்டாம் பாகம் ஜனநாயக உரிமைகள் குறித்த கதையம்சம் கொண்டது என்றும் அவர் தெரிவித்துள்ளார்.
மேலும் முதல் பாகத்தில் நயன்தாரா மாவட்ட ஆட்சி தலைவர் பதவியை ராஜினாமா செய்துவிட்டு மக்கள் சேவை செய்ய போவதாக கூறியிருப்பதுடன் முடிவடைந்திருக்கும். இந்த நிலையில் 'அறம் 2' படத்தில் அவர் மக்கள் அமைப்பு அல்லது அரசியல் கட்சி ஆரம்பிக்கும் வகையில் இருக்கும் என எதிர்பார்க்கப்படுகிறது.
ஐரா, விஸ்வாசம், சைரா நரசிம்மரெட்டி, சிவகார்த்திகேயன் - ராஜேஷ் எம் படம் என பிசியாக இருக்கும் நயன்தாரா விரைவில் 'அறம் 2' படத்தின் படப்பிடிப்பில் கலந்து கொள்வார் என எதிர்பார்க்கப்படுகிறது.