நயன்தாராவின் உண்மையான திருமண தேதி.. முடிவுக்கு வரும் வாடகைத்தாய் விவகாரம்
- IndiaGlitz, [Sunday,October 16 2022]
நடிகை நயன்தாரா இயக்குனர் விக்னேஷ் சிவனை கடந்த ஜூன் 9ஆம் தேதி திருமணம் செய்துகொண்ட நிலையில் அவருடைய உண்மையான பதிவு திருமணம் 6 ஆண்டுகளுக்கு முன்பே நடந்ததாக தற்போது தெரியவந்துள்ளது.
நடிகை நயன்தாரா - விக்னேஷ் சிவன் தம்பதிகள் திருமணமான 4 மாதத்தில் குழந்தை பெற்றுக் கொண்டதால் பெரும் சர்ச்சை எழுந்தது என்பதும், இதுகுறித்து விசாரணை செய்ய தமிழக அரசு மூன்று நபர் குழு ஒன்றை அமைத்து என்பதும் குறிப்பிடத்தக்கது.
அதுமட்டுமின்றி சென்னை காவல்துறை ஆணையத்தில் வழக்கறிஞர் ஒருவர் நயன்தாரா சட்டத்தை மீறியுள்ளதாகவும் இது குறித்து விசாரிக்க வேண்டும் என்றும் புகார் அளித்திருந்தார்.
இந்த நிலையில் விசாரணைக் குழுவிடம் நயன்தாரா - விக்னேஷ் சிவன் தம்பதிகள் சில ஆவணங்களை சமர்ப்பித்ததாகவும் அந்த ஆவணங்களில் நயன்தாரா-விக்னேஷ் சிவன் ஆறு ஆண்டுகளுக்கு முன்பே திருமணம் பதிவு திருமணம் செய்த விபரங்கள் உள்ளதாகவும் தெரிகிறது.
அது மட்டுமின்றி இந்தியாவில் வாடகைத்தாய் முறைக்கு ஜனவரி மாதம் முதல் தான் கட்டுப்பாடுகள் பிறப்பிக்கப்பட்டது என்பதும் ஆனால் டிசம்பர் மாதமே வாடகைத்தாய்க்கான ஒப்பந்தம் செய்யப்பட்டதாகவும் அதற்கான ஆவணத்தையும் நயன்தாரா-விக்னேஷ் சிவன் தம்பதிகள் கொடுத்துள்ளதாக தெரிகிறது. இதனை அடுத்து கடந்த சில நாட்களாக பரபரப்பை ஏற்படுத்திய நயன்தாரா வாடகைத்தாய் விவகாரம் முடிவுக்கு வருவதாக கூறப்படுகிறது.