కోలీవుడ్ లేడీ సూప‌ర్‌స్టార్ న‌య‌న‌తార మ‌హిళా ప్ర‌ధాన‌మైన పాత్ర‌ల్లో న‌టిస్తూ వ‌రుస విజ‌యాల‌ను సొంతం చేసుకుంటుంది. ఇప్పుడు ఆమె న‌టిస్తోన్న మ‌రో లేడీ ఓరియెంటెడ్ మూవీ 'ఐరా'. ఈ సినిమా తెలుగు, త‌మిళ టీజ‌ర్ నేడు విడుద‌లైంది. ఇప్ప‌టి వ‌ర‌కు న‌య‌న‌తార మెయిన్‌లీడ్‌గా న‌టించిన చిత్రాల‌న్నీ తమిళం త‌ర్వాతే తెలుగులోకి విడుద‌లయ్యేవి.

కానీ ఇప్పుడలా కాకుండా రెండు భాష‌ల్లో ఒకేసారి విడుదల చేయాల‌ని ప్లాన్ చేస్తున్నారు. ట్రైడెంట్ ఆర్ట్స్ బ్యాన‌ర్‌ పై ఆర్.ర‌వీంద్ర‌న్ సినిమాను విడుద చేస్తున్నారు. కె.జె.ఆర్‌.స్టూడియోస్ బ్యాన‌ర్‌పై కోట‌పాడి జె.రాజేష్ సినిమాను నిర్మిస్తున్నారు. సార్జున్ కె.ఎం. ద‌ర్శ‌కుడు.

మ‌ళ్లీ ఆడ‌పిల్ల పుట్టిందిరా!

అయ్యో! ఆడ‌పిల్లా!

అనే డైలాగ్స్‌తో టీజ‌ర్ మొద‌లైంది.

నే చెప్పానుగా.. నీ కోసం వ‌స్తాన‌ని చెప్పానుగా ..

నాకే తెలియ‌ని ఓ ఆరుగురు నా త‌ల‌రాత‌ను త‌ల‌క్రిందులుగా రాశారు

నాకు భ‌యంగా ఉంద‌మ్మా.. అనే డైలాగ్స్‌తో సినిమా స‌స్పెన్స్ థ్రిల్ల‌ర్ అని, హార‌ర్ ఎలిమెంట్స్ కూడా ఉన్నాయ‌ని అర్థ‌మ‌వుతోంది.

అంద‌రికీ సంతోషంగా బ్ర‌త‌కడం ఒక క‌ల‌. కానీ జీవితంలో సంతోషం అంటే ఏంటో తెలియ‌ని నాకు బ్ర‌త‌క‌డ‌మే ఒక క‌ల అనే డైలాగ్‌తో టీజ‌ర్ ఎండ్ అయ్యింది.

ఇందులో న‌య‌న‌తార డబుల్ రోల్ చేస్తుంద‌ని వార్త‌లు విన‌ప‌డుతున్నాయి. క‌లైఅర‌స‌న్‌, యోగిబాబు కీల‌క పాత్ర‌ధారులు. టీజ‌ర్ ఆస‌క్తిక‌రంగా ఉంది. మ‌రి సినిమా రీలీజ్ గురించి త్వ‌ర‌లోనే అధికారిక స‌మాచారం వెలువ‌డొచ్చు. తెలుగులో డైలాగ్స్‌ను శ‌శాంక్ వెన్నెల‌కంటి రాయ‌గా.. పాట‌ల‌ను రాకేందు మౌళి రాశారు.