லேடி சூப்பர்ஸ்டார் நயன்தாரா முக்கிய வேடத்தில் நடித்த திகில் படமான 'மாயா' சூப்பர் ஹிட் ஆனதை அடுத்து அவர் நடித்துள்ள மற்றொரு திகில் படம் 'டோரா'. இந்த படத்தின் படப்பிடிப்பு, போஸ்ட் புரடொக்ஷன்ஸ் ஆகியவை முடிந்து ரிலீசுக்கு தயாராக இருக்கும் நிலையில் தற்போது இந்த படத்தின் ரிலீஸ் தேதி அதிகாரபூர்வமாக அறிவிக்கப்பட்டுள்ளது.

'டோரா' திரைப்படம் மார்ச் 31ஆம் தேதி உலகமெங்கும் ரிலீஸ் ஆகும் என்று அறிவிக்கப்பட்டுள்ளது. தமிழகத்தில் இந்த படத்தை ஆரோ சினிமாஸ் நிறுவனம் வெளியிடுகிறது. நாயகி நயன்தாராவுக்கு முழுக்க முழுக்க முக்கியத்துவம் கொடுக்கப்பட்டுள்ள இந்த படத்தின் டீசர் சமீபத்தில் வெளிவந்து மிகப்பெரிய வரவேற்பை பெற்றது. குறிப்பாக நயன்தாரா நடந்து வரும் ஒரு காட்சிக்கு இணையதளங்களில் பெரும் பாராட்டுக்கள் கிடைத்தது.

பெரிய ஸ்டார் ஹீரோக்களின் படங்களுக்கு இணையாக புரமோஷன் செய்யப்பட்டு வரும் இந்த படத்தில் நயன்தாரா , தம்பிராமையா, ஹரிஷ் உத்தமன் உள்பட பலர் நடித்துள்ளனர். இந்த படத்திற்கு தினேஷ் கிருஷ்ணன் ஒளிப்பதிவும், கோபிகிருஷ்ணா படத்தொகுப்பும் செய்துள்ளனர். விவேக்-மெர்வின் இரட்டையர்கள் இசையமைத்துள்ள இந்த படத்தின் பாடல்கள் ஏற்கனவே ஹிட்டாகியுள்ளது. குறிப்பாக அனிருத் பாடிய 'ரா ரா ரா' என்ற பாடல் பட்டிதொட்டியெங்கும் ஒலித்து கொண்டிருக்கின்றது,. இந்த படத்தை பிரபல இயக்குனர் சற்குணம் தயாரித்துள்ளார். அவரது உதவியாளர் தாஸ்ராமசாமி இந்த படத்தின் மூலம் இயக்குனராகியுள்ளார்.