Allu Arjun:అభిమానులకు బిగ్‌ సర్‌ప్రైజ్ ఇచ్చిన బన్నీ.. 'పుష్ప 2' లొకేషన్ పంచుకున్న ఐకాన్ స్టార్
- IndiaGlitz, [Wednesday,August 30 2023]
జాతీయ ఉత్తమ నటుడి అవార్డ్ అందుకున్న తొలి తెలుగు నటుడు అల్లు అర్జున్ ప్రస్తుతం ఆ సంతోషాన్ని ఎంజాయ్ చేస్తున్నారు. ఇప్పటికే ఆయనకు అభిమానులు, కుటుంబ సభ్యులు, సినీ ప్రముఖులు విషెస్ తెలియజేస్తున్నారు. తాజా బన్నీ అభిమానులకు సర్‌ప్రైజ్ ఇచ్చారు. తన దినచర్య ఎలా ప్రారంభమవుతుందో చెబుతూ.. పుష్ప 2 మేకింగ్ వీడియోను ఇన్‌స్టాగ్రామ్‌లో షేర్ చేశారు. సుకుమార్ దర్శకత్వంలో తెరకెక్కుతోన్న పుష్ప 2 షూటింగ్ అత్యంత వేగంగా జరుగుతోంది. ఇందుకోసం హైదరాబాద్ రామోజీ ఫిల్మ్‌సిటీలో సెట్స్ వేశారు. వీటిని అల్లు అర్జున్ తన అభిమానులతో పంచుకున్నారు.
నా అభిమానులు గర్వపడేలా వుంటా:
‘‘ప్రపంచవ్యాప్తంగా మిగిలిన దేశాలతో పోలిస్తే భారతదేశంలో అభిమానులు చాలా భిన్నంగా వుంటారు. వాళ్ల ప్రేమను, అభిమానాన్ని వివరించడం చాలా కష్టం అన్నారు. పుష్ప 2 షూటింగ్ జరుగుతున్న సమయంలో తనను కలిసేందుకు అభిమానులు వచ్చారని.. తనను చూసి వారు గర్వపడేలా వుంటానని అల్లు అర్జున్ తెలిపారు. పుష్పలో తనకు పుష్పరాజ్ పాత్ర అంటే చాలా ఇష్టమని.. ఎందుకంటే అతను దేనికీ వెనుకంజ వేయడని బన్నీ చెప్పారు. ఇదే వీడియోలో డైరెక్టర్ సుకుమార్ మాట్లాడుతూ.. పుష్ప 2 తనకెంతో స్పెషల్ అన్నారు.
ఇన్‌స్టాగ్రామ్‌తో జతకట్టిన తొలి ఇండియన్ స్టార్ :
ఇదిలావుండగా.. ఇప్పటికే తన పేరిట ఎన్నో రికార్డులు నమోదు చేసిన అల్లు అర్జున్ మరో ఘనతను అందుకున్నారు. ఇన్‌స్టాగ్రామ్‌తో కొలాబరేట్ అయిన తొలి భారతీయ నటుడిగా ఆయన రికార్డుల్లోకెక్కారు. బాలీవుడ్ నుంచి టాలీవుడ్ వరకు ఇప్పటి వరకు ఏ ఇండియన్ స్టార్‌కు ఈ రికార్డు దక్కలేదు. ఈ మేరకు ఇన్‌స్టాగ్రామ్ బృందం హైదరాబాద్‌కు వచ్చి ఆయనకు సంబంధించిన కొన్ని వీడియోలను చిత్రీకరించింది. ఒక రోజంతా అల్లు అర్జున్ ఇంట్లోనే గడిపింది. ఈయన దినచర్య ఎలా ప్రారంభమవుతుందన్న దానిని చిత్రీకరించింది. ఆ వీడియోను బన్నీ ఇన్‌స్టా‌లో షేర్ చేశారు.