‘మా’ ఎన్నికలు రసవత్తరంగా సాగుతున్నాయి. బస్తీ మే సవాల్ అంటూ రియల్ లైఫ్‌‌లో శివాజీ రాజా.. నరేశ్ తలపడుతున్నారు. ఇప్పటికే టాలీవుడ్‌‌లో బడా ఫ్యామిలీస్ మద్దతు తనకే ఉందని నరేశ్ చెబుతుండగా.. తాను చేసిన మంచి పనులే మరోసారి ‘మా’ అధ్యక్ష పీఠం దక్కేలా చేస్తాయని శివాజీ రాజా ధీమా వ్యక్తం చేస్తున్నారు. మరోవైపు మహిళల మద్ధతు తనకుంది కచ్చితంగా వైస్ ప్రెసిడెంట్‌‌గా గెలుస్తానని నటి హేమ ధీమాతో ఉన్నారు.

ఆదివారం ఉదయం పోలింగ్ ప్రక్రియ ప్రారంభమైంది. నువ్వా.. నేనా అంటూ రసవత్తరంగా సాగుతున్న ఈ ఎన్నికల్లో ఓటర్లను మభ్యపెట్టేందుకు అక్కడక్కడా కాసుల వర్షం కురిపించినట్లు విశ్వసనీయవర్గాల సమాచారం. ఈ విషయంపై మా బరిలో ఉన్న నరేశ్ మాట్లాడుతూ.. అవును శివాజీ రాజా ప్యానెల్ డబ్బులు పంచుతున్నారు.. ఇలా చేయడం చాలా బాధాకరమని ఆయన చెప్పుకొచ్చారు. అయితే నరేశ్ ఆరోపణలపై శివాజీ రాజా మాత్రం స్పందించలేదు. పోలింగ్ అనంతరం శివాజీ రాజా, నరేశ్ ఇద్దరూ మీడియా మీట్ నిర్వహించనున్నట్లు సమాచారం.

కాగా.. మధ్యాహ్నం 12గంటల వరకు 180 ఓట్లు పోలయ్యాయమని తెలుస్తోంది. ఇక రెండు గంటలకే పోలింగ్‌‌కు సమయం ఉంది. ఇప్పుడిప్పుడే నటీనటులంతా ఫిల్మ్‌ఛాంబర్‌‌కు చేరుకుంటున్నారు.