'మా' ఎన్నికలు.. నరేష్, రాజశేఖర్, జీవిత పోటీ
- IndiaGlitz, [Saturday,March 02 2019]
తెలుగు సినిమా నటీనటుల సంఘం అధ్యక్ష ఎన్నికలు 2019-21 సంవత్సరానికి మా ఎన్నికలు త్వరలో జరగనున్నాయి. మా అసోసియేషన్ అధ్యక్ష పదవికి నటుడు నరేష్ నామినేషన్ దాఖలు చేశారు.
అనంతరం మీడియాతో మాట్లాడిన ఆయన.. మా అసోసియేషన్ లో ఎన్నికలు కోరుకోం. మేమంతా ఓకే కుటుంబం. గత టర్మ్ రాజేంద్రప్రసాద్, శివాజీ రాజా, నేను ఉన్నాం. ఒక్కో టర్మ్ ఒక్కొక్కరు ఉండాలనుకున్నాం. ఈ టర్మ్‌లో పెద్దలు, సభ్యుల కోరిక మేరకు నేను పోటీ చేస్తున్నాను. నేను ఎప్పుడు పదవులు ఆశించలేదు. మహిళా జనరల్ సెక్రటరీ కోసం జీవితా రాజశేఖర్‌ను పోటీ చేయమని కోరాం. పోటీకి ఆమె అంగీకరించారు. ఉపాధ్యక్షుడిగా రాజశేఖర్ పోటీకి ఒప్పుకున్నారు. కోశాధికారిగా కోటా శంకర్ రావు పోటీ చేస్తున్నారు. మార్చి 10న మా అసోసియేషన్ ఎన్నికలు జరుగుతాయి అని నరేష్ స్పష్టం చేశారు.
ఈ సందర్భంగా రాజశేఖర్ మాట్లాడుతూ.. నరేష్ నిజాయతీ మెచ్చే ఈ ఎన్నికల్లో పోటీకి ఒప్పుకున్నాం. ఈ ఎన్నికలో పోటీ లేకుండా ఉంటుందని ఆశిస్తున్నాను. ప్రేమగా పని చేయడానికి మా ఎన్నికల్లో పోటీ చేస్తున్నాను అని రాజశేఖర్ చెప్పారు.
జీవితా రాజశేఖర్ మాట్లాడుతూ.. మా ఎన్నికల్లో ఆడవాళ్లకు కీలక పదవులు లేవు. ఈసారి స్వతంత్రంగానైనా పోటీ చేద్దామనుకున్నాను. నరేష్ వచ్చి జనరల్ సెక్రటరీగా పోటీ చేయమని కోరారు.. మారు మాట చెప్పకుండా నేను అంగీకరించాను. ఎన్నిక ఏకగ్రీవం కానందునే పోటీ చేస్తున్నాం. 'మా' గౌరవప్రదమైన స్థాయిలో ఉండాలి.
‘మా’ తలెత్తుకొని తిరగాలి. 'మా' అసోసియేషన్ సరిగా పనిచేయడం లేదని అనిపించింది. మా ఫ్యానల్‌ గెలిస్తే మంచి పనులు చేస్తాం. పని చేసేవాళ్లకే సభ్యులు ఓటెయ్యండి అని జీవితా రాజశేఖర్ 'మా' సభ్యులకు పిలుపునిచ్చారు. అయితే ఎలాంటి పోటీ లేకుండా ఎన్నిక జరుగుతుందో ..? లేకుంటే పోటీ ఉంటుందో తెలియాలంటే మరికొన్ని రోజులు వేచి చూడాల్సిందే.