இயக்குனர் கார்த்திக் நரேன் இயக்கிய முதல் படமான 'துருவங்கள் பதினாறு' மிகப்பெரிய வெற்றியை பெற்று அனைத்து தரப்பினர்களின் பாராட்டுக்களை பெற்ற நிலையில் அவர் தற்போது 'நரகாசுரன்' என்ற படத்தை இயக்கி வருகிறார். கவுதம் மேனன் தயாரிப்பில் உருவாகி வரும் இந்த படத்தில் அரவிந்தசாமி, இந்திரஜித், சுகுமாரன், சந்தீப் கிஷான், ஆத்மிகா, ஸ்ரேயா உள்பட பலர் நடித்து வருகின்றனர்.

இந்த படத்தின் முதல்கட்ட படப்பிடிப்பு சமீபத்தில் ஊட்டியில் முடிவடைந்த நிலையில் மிக விரைவில் இரண்டாம் கட்ட படப்பிடிப்பு தொடங்கவுள்ளது. இந்த படப்பிடிப்பில் அரவிந்தசாமி உள்பட படக்குழுவினர் அனைவரும் கலந்து கொள்ளவுள்ளனர். இந்த படத்தை வரும் பிப்ரவரி மாதம் வெளியிட படக்குழுவினர் திட்டமிட்டு அதற்கேற்றவாறு படப்பிடிப்பு மற்றும் போஸ்ட் புரொடக்சன்ஸ் பணியை நடத்தி வருகின்றனர்.

ரான் எதான் யோஹன் இசையமைப்பில் உருவாகி வரும் இந்த படத்திற்கு சுஜித் சரங் ஒளிப்பதிவும், ஸ்ரீஜித் சரங் படத்தொகுப்பு பணிகளையும் செய்து வருகின்றனர். கார்த்திக் நரேனின் முதல் படம் போலவே இந்த படமும் த்ரில் மற்றும் சஸ்பென்ஸ் கலந்து இருக்கும் என்று எதிர்பார்க்கப்படுவதால் இந்த படமும் நல்ல வரவேற்பை பெறும் என்று கருதப்படுகிறது.