గ్రీన్ ఇండియా ఛాలెంజ్‌లో పాల్గొన్న ‘‘శ్యామ్ సింగరాయ్’’ టీమ్
- IndiaGlitz, [Sunday,December 19 2021]
టీఆర్ఎస్ రాజ్యసభ సభ్యుడు జోగినిపల్లి సంతోష్ కుమార్ ప్రారంభించిన గ్రీన్ఇండియా ఛాలెంజ్ అప్రతిహతంగా సాగుతోంది. సెలబ్రెటీలను, క్రీడాకారులను, రాజకీయ నాయకులను ఇన్‌వాల్వ్ చేస్తూ చెట్లు నాటిస్తున్నారాయన. కోవిడ్ సమయంలో గ్యాప్ వచ్చినా .. తర్వాత మళ్లీ కార్యక్రమం ఊపందుకుంది. ఏకంగా ప్రధాని నరేంద్ర మోడీ సైతం గ్రీన్ ఇండియా ఛాలెంజ్ కార్యక్రమాన్ని ప్రశంసించారు.
తాజాగా ‘శ్యామ్‌సింగరాయ్‌’ టీమ్ కూడా గ్రీన్ ఇండియా ఛాలెంజ్ పాల్గొంది. జూబ్లీహిల్స్‌లోని జీహెచ్‌ఎంసీ పార్కులో నాని, సాయిపల్లవి, కృతిశెట్టి, నిర్మాత వెంకట్ మొక్కలు నాటారు. ఈ సందర్భంగా నాని మాట్లాడుతూ.. ‘‘ఎంపీ సంతోష్ కుమార్ ఈ ఛాలెంజ్‌ని ఒక ఉద్యమంలా ముందుకు తీసుకువెళ్తున్నారని ప్రశంసించారు. ప్రతి ఒక్కరూ దీనిని బాధ్యతగా స్వీకరించి మొక్కలు నాటి... పర్యావరణాన్ని పరిరక్షించుకోవాలి అని నేచురల్ స్టార్ పిలుపునిచ్చారు. అనంతరం ఎయిర్‌టెల్‌ హైదరాబాద్ మారథాన్‌లో ఈ బృందం పాల్గొంది.
ఇక సినిమాల విషయానికి వస్తే.. నేచురల్ స్టార్ నాని దూకుడు పెంచారు. ఇప్పటికే టక్ జగదీశ్‌తో పర్వాలేదనిపించుకున్న ఆయన తాజాగా నటించిన చిత్రం ‘‘శ్యామ్ సింగరాయ్’’. ఈ చిత్రాన్ని హారిక ఎంటర్టైన్మెంట్స్ బ్యానర మీద వెంకట్ బోయనపల్లి నిర్మించగా.. రాహుల్ సంకృత్యాన్ దర్శకత్వం వహించారు. 1970లలో కోల్‌కతా బ్యాక్ డ్రాప్‌లో పీరియాడికల్ యాక్షన్ ఎంటర్టైనర్ గా ఈ చిత్రాన్ని రూపొందిస్తున్నారు. క్రిస్మస్ కానుకగా డిసెంబ‌ర్ 24న చిత్రాన్ని ప్రేక్షకుల ముందుకు తీసుకురానున్నారు. కెరీర్‌లో తొలిసారి నాని తెలుగుతో పాటు త‌మిళ, క‌న్న‌డ, మ‌ల‌యాళ భాష‌ల్లోనూ తన సినిమాను ఒకేసారి విడుద‌ల చేస్తుండం విశేషం. ఈ సినిమాలో నాని సరసన సాయి పల్లవి, మడోన్నా సెబాస్టియన్, కృతిశెట్టి నటించారు.