నానితో కొత్తమ్మాయి
- IndiaGlitz, [Tuesday,January 09 2018]
వరుస విజయాలతో డబుల్ హ్యాట్రిక్ హీరోగా పేరు తెచ్చుకున్నారు నేచురల్ స్టార్ నాని. భిన్నమైన కథలతో, విలక్షణమైన నటనతో నిర్మాతల పాలిట కల్పవృక్షంగా మారారు ఈ స్టార్ హీరో. ఈ హీరోతో కలిసి నటిస్తే దశ తిరిగిపోతుందని హీరోయిన్స్ కూడా భావిస్తున్నారు. అందుకే ఈ హీరోతో కలిసి సినిమాలు చేయడానికి నిర్మాతలు, డైరెక్టర్లే కాదు.. హీరోయిన్స్ కూడా ఆసక్తి చూపిస్తున్నారు.
వీరి భావనను నిజం చేస్తూ గతంలో జెంటిల్ మ‌న్' మజ్ను' సినిమాలతో తెలుగు తెరకు పరిచయమైన నివేదా థామస్, అను ఇమ్మాన్యుయేల్.. నానితో నటించి స్టార్ హీరోయిన్లుగా ఎదుగుతున్నారు. వీరిద్దరూ మలయాళీ ముద్దుగుమ్మలు కావడం విశేషం. ఈ క్రమంలో కిషోర్ తిరుమలతో నాని చేయబోయే సినిమాకి కూడా మలయాళీ భామనే నాయికగా తీసుకోవాలని చిత్ర యూనిట్ భావిస్తోందని సమాచారం. అయితే ఇప్పటికే ఇద్దరు అమ్మాయిల్ని ప‌రిశీలిస్తున్న‌ట్లు వార్తలు వస్తున్నాయి. వారిలో ఎవ‌రో ఒకరిని మాత్ర‌మే కథానాయికగా తీసుకుంటారని కూడా టాక్ వినిపిస్తోంది. మరి ఆ దశ తిరిగే అవకాశం.. ఏ అమ్మాయిని వరిస్తుందో చూడాలి.