ఇటీవ‌లే `మ‌జిలీ`తో విజ‌యాన్ని చ‌విచూసిన శివ నిర్వాణ‌కు అస‌లు తొలి బ్రేక్ ఇచ్చింది నాని. `నిన్ను కోరి`వంటి కాంప్లెక్స్ స్క్రిప్ట్ ను అంగీక‌రించి, శివ నిర్వాణ‌కు ఓ లైఫ్ ఇచ్చాడు నాని. ఆ అవ‌కాశాన్ని శివ కూడా చాలా జాగ్ర‌త్త‌గా కాపాడుకున్నాడు. అటు నాని, ఆది పినిశెట్టి, నివేదా థామ‌స్‌కు శివ నిజంగా మంచి కేర‌క్ట‌ర్స్ రాశాడు. ఆ సినిమా తెచ్చిన క్రెడిబిలిటీని నాగ‌చైత‌న్య‌, స‌మంత క‌లిసి న‌టించిన `మ‌జిలీ` కాపాడింది. ఈ స‌మ్మ‌ర్‌లో మంచి సినిమాగా నిలిచింది. పెళ్ల‌య్యాక నాగ‌చైత‌న్య‌, స‌మంత కాంబినేష‌న్‌లో హిట్ సినిమాగా నిలిచింది.

ఈ త‌రుణంలో శివ నిర్వాణ చేయ‌బోయే త‌ర్వాతి చిత్రం మీద ఎక్స్ పెక్టేష‌న్స్ ఉన్నాయి. తాజాగా ఆ సినిమా గురించి ఉప్పందింది. నాని హీరోగా ఓ మంచి ఫ్యామిలీ, ఎమోష‌న‌ల్ కంటెంట్‌ను స్క్రీన్ మీద‌కు తీసుకురానున్నారు శివ నిర్వాణ‌. నాని హీరోగా గ‌తంలో కృష్ణార్జున యుద్ధం చిత్రాన్ని తెర‌కెక్కించిన షైన్ స్క్రీన్ నిర్మాత‌ల‌కు ఈ క‌థ బాగా న‌చ్చింద‌ట‌. దాంతో హ‌రీష్ పెద్ది, సాహు గార‌పాటి ఈ సినిమాను నిర్మించ‌డానికి ముందుకొచ్చారు. వ‌చ్చేఏడాది ప్ర‌థ‌మార్ధంలో ఈసినిమా సెట్స్ మీద‌కు వెళ్తుంది.

ప్ర‌స్తుతం శివ నిర్వాణ స్క్రిప్ట్ ఫైన‌లైజింగ్ ప‌నుల్లో ఉన్నార‌ట‌. లైన్‌గా విన్న నాని ఓకే చెప్పేశారు. శివ ట్రీట్‌మెంట్ రాసుకుంటున్నార‌ని తెలిసింది.ఈ చిత్రం ప్రీ ప్రొడ‌క్ష‌న్‌, లొకేష‌న్ సెర్చింగ్ వంటివ‌న్నీ పూర్త‌య్యే స‌రికి, నాని మిగిలిన క‌మిట్‌మెంట్స్ కూడా పూర్త‌వుతాయి.

ప్ర‌స్తుతం నాని `గ్యాంగ్ లీడ‌ర్‌`తో బిజీగా ఉన్నారు. వ‌చ్చే నెల 13న `గ్యాంగ్ లీడ‌ర్` విడుద‌ల కానుంది. ఇప్ప‌టికే ఆయ‌న మోహ‌న‌కృష్ణ ఇంద్ర‌గంటి ద‌ర్శ‌క‌త్వంలో `వి` చిత్రంలో విల‌న్‌గా న‌టిస్తున్నారు. ఆయ‌న కెరీర్‌లో నెగ‌టివ్ షేడ్స్ తో విల‌న్‌గా న‌టించ‌డం ఇదే తొలిసారి. ఈ సినిమాలోనే సుధీర్ బాబు పోలీస్‌గా న‌టిస్తున్నారు. అదితిరావు హైద‌రీ, నివేదా థామ‌స్ నాయిక‌లు. ఈ న‌లుగురూ ఇంత‌కు ముందు మోహ‌న‌కృష్ణ ఇంద్ర‌గంటితో న‌టించిన వారు కావ‌డం గ‌మ‌నార్హం.