ఇష్క్‌, మ‌నం, 24 చిత్రాల‌తో హ్యాట్రిక్ విజ‌యాల‌ను సొంతం చేసుకున్న ద‌ర్శ‌కుడు విక్ర‌మ్ కె.కుమార్‌. అయితే ఇటీవ‌ల‌ విడుద‌లైన హ‌లో నిరాశ‌ప‌రిచింది. కాగా.. త‌న త‌దుప‌రి చిత్రాన్ని నేచుర‌ల్ స్టార్ నానితో చేయ‌బోతున్న‌ట్లు వార్త‌లు వినిపించాయి. నాని కూడా ఇటీవ‌ల ఈ విష‌యాన్ని ధృవీక‌రించారు.  తాజా స‌మాచారం ప్రకారం ఈ సినిమా ప‌ట్టాలెక్కే అవ‌కాశం క‌నిపించ‌డం లేద‌ని తెలిసింది. కాస్త వివ‌రాల్లోకి వెళితే.. చాలా రోజుల క్రితం నానికి మంచి పాయింట్ చెప్పి   గ్రీన్ సిగ్న‌ల్ పొందిన విక్ర‌మ్‌.. ఇటీవ‌ల నానికి ఫుల్ స్క్రిప్ట్ నేరేట్ చేశార‌ట‌.

అయితే.. పూర్తి స్క్రిప్ట్ సంతృప్తి ప‌ర‌చ‌క‌పోవ‌డంతో.. విక్ర‌మ్ కుమార్ ప్రాజెక్ట్‌ను నాని సున్నితంగా తిర‌స్క‌రించార‌ని టాలీవుడ్ వ‌ర్గాలు పేర్కొంటున్నాయి. ఆ మ‌ధ్య వ‌రుస విజ‌యాల‌తో స్పీడ్ మీదున్న నానికి.. తాజా చిత్రం కృష్ణార్జున యుద్ధం రూపంలో ప‌రాజ‌యం ఎదుర‌య్యింది. ఈ నేప‌థ్యంలో.. త‌న నెక్ట్స్ ప్రాజెక్ట్స్ విష‌యంలో ఆచితూచి అడుగులు వేస్తున్నారు. అందులో భాగంగానే.. విక్ర‌మ్ చెప్పిన క‌థ న‌చ్చ‌క‌పోవ‌డంతో నో చెప్పార‌ని తెలిసింది. ప్ర‌స్తుతం నాని.. నాగార్జున‌తో క‌లిసి ఓ మ‌ల్టీస్టార‌ర్ మూవీ చేస్తున్న సంగ‌తి తెలిసిందే.