ఇదేంటి.. వైసీపీ ఎమ్మెల్యేకు.. నేచురల్ స్టార్ నానికి ఏం సంబంధం..? అని ఆశ్చర్యపోతున్నారా.. అవును మీరు వింటున్నది నిజమే వైసీపీ ఎమ్మెల్యేతో నానికి మంచి సత్సంబంధాలు ఉన్నాయి. త్వరలో నాని హీరోగా నటించిన ‘గ్యాంగ్ లీడర్’ సినిమా రిలీజ్ కానున్న నేపథ్యంలో అఖిలాండ కోటి బ్రహ్మాండ నాయకుడు కొలువైన తిరుమల వెంకన్నను ఆయన దర్శించుకున్నారు. ఈ సందర్భంగా మీడియాతో మాట్లాడిన ఆయన.. చంద్రగిరి ఎమ్మెల్యే చెవిరెడ్డి భాస్కర్‌రెడ్డిపై ప్రశంసల వర్షం కురిపించారు.

ముందే దర్శించుకున్నాం!

తిరుమలను దర్శించుకుంటే ఓ తెలియని పాజిటివ్ ఫీలింగ్ వచ్చేస్తుందని ఈ సందర్భంగా నాని చెప్పుకొచ్చారు. అంతటితో ఆగని ఆయన.. స్వామివారిని దర్శించుకోవాలనీ ఎప్పుడో అనుకున్నాననీ, అయితే షూటింగ్ కారణంగా కాస్త ఆలస్యమైందన్నారు. అయితే లక్కీగా ఈసారి ‘గ్యాంగ్ లీడర్’ సినిమా విడుదలకు ముందే వెంకన్నను దర్శించుకోగలిగామని నాని చెప్పుకొచ్చారు.

చెవిరెడ్డి కారణంగానే..!

చెవిరెడ్డిపై నాని ప్రశంసల వర్షం కురిపించారు. ‘ఈ రోజు చెవిరెడ్డి కారణంగా స్వామివారి దర్శనం నాకు బాగా జరిగింది.. చాలా సంతోషంగా ఉంది. ఇందుకు చెవిరెడ్డికి నాని థ్యాంక్స్. మేము ఫుల్ పాజిటివ్ ఎనర్జీతో తిరుపతి నుంచి తిరిగివెళుతున్నాం’ అని నాని మీడియాకు వివరించారు. కాగా.. ‘గ్యాంగ్ లీడర్’ సినిమా ఈ నెల 13న విడుదల కానున్న సంగతి తెలిసిందే.