నాని, కిషోర్ తిరుమల చిత్రం అప్ డేట్
- IndiaGlitz, [Monday,January 29 2018]
భావోద్వేగభరితమైన సన్నివేశాలని ఎంతో సహజంగా చిత్రీకరించడంలోనూ.. అంతే చక్కగా మాటలు రాయడంలోనూ దిట్ట ద‌ర్శ‌కుడు కిషోర్ తిరుమల. తన మొదటి చిత్రం నేను శైలజ'తో అది నిరూపితమైంది. రెండో సినిమా ఉన్నది ఒకటే జిందగీ' ఆశించిన విజయం సాధించకపోయినా.. ఈ డైరెక్టర్ ప్ర‌తిభ‌ని ఎవరూ సందేహంచ‌లేదు. అందుకే ఈ నేచురల్ డైరెక్టర్‌కి నేచురల్ స్టార్ నాని ఒక అవకాశం ఇచ్చేసారు. ప్రస్తుతం నాని కృష్ణార్జున యుద్ధం' సినిమాతో బిజీగా ఉన్నారు.
ఈ చిత్రం పూర్తైన వెంటనే నాగార్జునతో కలిసి మల్టీ స్టారర్ మూవీలో నటించబోతున్నారు నాని. దీనికి శ్రీరామ్ ఆదిత్య దర్శకత్వం వ‌హించ‌నున్నారు. ఈ సినిమా ఫిబ్రవరి 24 నుంచి చిత్రీకరణ జరుపుకోనుందని టాలీవుడ్ వర్గాలు చెబుతున్నాయి. ఈ మూవీ ఒక షెడ్యూల్ పూర్తి కాగానే...కిషోర్ తిరుమలతో సినిమాని మొదలు పెట్టనున్నారు నాని. ఫిబ్రవరి తర్వాత మొదలు కానున్న ఈ చిత్రాన్ని మైత్రి మూవీ మేకర్స్ నిర్మిస్తుంది. అలా ఈ రెండు సినిమాలను సమాంతరంగా చేయడానికి డేట్లను కూడా నాని అడ్జస్ట్ చేసినట్లు సమాచారం.
ఇదిలా ఉంటే...మైత్రి మూవీ మేకర్స్ ప్రస్తుతం అర్జున్ రెడ్డి' ఫేం విజయ్ దేవరకొండతో ఒక సినిమా.. అలాగే డైరెక్టర్ సందీప్ రెడ్డి వంగతో మరో మూవీని నిర్మించనున్నట్లు వెల్లడించింది. ప్రస్తుతం ఈ సంస్థ నిర్మిస్తున్న సవ్యసాచి' చిత్రీకరణ దశలో ఉండగా...రామ్ చరణ్, సుకుమార్ కలయికలో తెర‌కెక్కుతున్న రంగస్థలం' సినిమా విడుదలకు సిద్ధంగా ఉంది.