தமிழ் திரையுலகில் நயன்தாரா மற்றும் த்ரிஷா போன்ற முன்னணி நடிகைகள் நாயகிக்கு முக்கியத்துவம் உள்ள படங்களில் மட்டும் நடித்து வரும் நிலையில் தற்போது அதே பாணியில் ஒரு படத்தில் நடித்து வருகிறார் நந்திதா ஸ்வேதா. பா.ரஞ்சித் இயக்கிய 'அட்டக்கத்தி' என்ற படத்தின் மூலம் தமிழில் அறிமுகமாகி அதன்பின்னர் எதிர்நீச்சல், 'இதற்குத்தானா ஆசைப்பட்டாய் பாலகுமாரா', 'முண்டாசுப்பட்டி, புலி உள்பட பல திரைப்படங்களில் நடித்த நந்திதாவின் அடுத்த பட டைட்டில் தற்போது அறிவிக்கப்பட்டுள்ளது

நந்திதாவின் நாயகிக்கு முக்கியத்துவம் உள்ள படத்தின் டைட்டில் 'ஐபிசி 376'. இந்திய தண்டனைச்சட்டம் 376 பிரிவு என்பது பாலியல் பலாத்காரம் உள்ளிட்ட பாலியல் குற்றங்கள் பிரிவு என்பதால் இந்த படத்தின் கதையும் பெண்களுக்கு எதிரான குற்றம் குறித்த கதையாக இருக்கும் என எதிர்பார்க்கப்படுகிறது. இந்த படத்தின் டைட்டிலுடன் கூடிய ஃபர்ஸ்ட்லுக்கில் நந்திதா இரண்டு வித்தியாசமான கெட்டப்பில் தோற்றமளிக்கின்றார்.

பவர்கிங் ஸ்டுடியோஸ் நிறுவனத்தின் எஸ்.பிரபாகர் தயாரிக்கும் இந்த படத்தை ராம்குமார் சுப்பராமன் இயக்கவுள்ளார். இந்த படத்தின் ஃபர்ஸ்ட்லுக்கை சற்றுமுன் நடிகரும் இசையமைப்பாளருமான ஜிவி பிரகாஷ் தனது சமூக வலைத்தள பக்கத்தில் வெளியிட்டுள்ளார் என்பது குறிப்பிடத்தக்கது.