விஜய்யுடன் 'அழகிய தமிழ்மகன்', அஜீத்துடன் 'பில்லா' உள்பட பல படங்களில் நடித்து ஒருகாலத்தில் தமிழ் சினிமாவில் கவர்ச்சி நடிகையாக வலம் வந்து கொண்டிருந்தவர் நடிகை நமீதா. கடந்த சில வருடங்களாக நமீதா, தமிழில் நடிக்கவில்லை என்றாலும் கன்னடத்தில் பிசியாக நடித்து கொண்டுதான் இருக்கின்றார். இந்நிலையில் மீண்டும் ஒரு சிறு இடைவெளிக்கு பின்னர் தற்போது கோலிவுட்டில் ரீ எண்ட்ரி ஆகிறார்.

கோலிவுட்டில் ரீஎண்ட்ரி ஆக நல்ல ஸ்கிரிப்டை எதிர்நோக்கி இருந்ததாகவும், தான் எதிர்பார்த்த ஸ்கிரிப்ட் தற்போது கிடைத்துள்ளதால் மீண்டும் தமிழில் நடிக்கவுள்ளதாக நமீதா தரப்பில் இருந்து கூறப்பட்டுள்ளது. பெண்களின் முக்கியத்துவத்தை குறிக்கும் வகையில் அமையவுள்ள ஒரு தமிழ்ப் படத்தில் நடிக்க நமீதா ஒப்பந்தம் செய்யப்பட்டுள்ளார். இந்த படத்தில் நமீதாவுக்கு முக்கியத்துவம் வாய்ந்த கேரக்டர் என்றும் இந்த படத்தை அறிமுக இயக்குனர் ஒருவர் இயக்கவுள்ளதாகவும் செய்திகள் வெளிவந்துள்ளது. இந்த படம் குறித்த அதிகாரபூர்வ அறிவிப்பு விரைவில் அறிவிக்கப்படவுள்ளது.

நமீதா தற்போது "பார்வதி புரா' என்ற கன்னட படத்தில் நடித்து வருகிறார். இந்த படத்தில் நமீதாவுடன் ராஜ்வர்தன், சாய்குமார், பார்வதி நாயர், ஷகிலா உள்பட பலர் நடித்து வருகின்றனர். இந்த படத்தின் படப்பிடிப்பு முடியுந்தருவாயில் இருப்பதாகவும், இந்த படத்திற்கு பின்னர் நமீதா தமிழ்ப்படத்தில் நடிப்பார் என்றும் கூறப்படுகிறது.