தென்னிந்திய நடிகர் சங்க உறுப்பினர்கள் இணைந்து, வரும் 2018 ஆம் ஆண்டு ஜனவரி 6ஆம் தேதி நட்சத்திர விழா ஒன்றை மலேசியாவில் நடத்த திட்டமிட்டுள்ளனர்.

நடிகர் சங்கத்தின் கட்டிட நிதிக்காக நடத்தப்படவுள்ள இந்த நட்சத்திர கலை விழாவில் ரஜினி, கமல் உள்பட 100க்கும் மேற்பட்ட நடிகர்கள் கலந்து கொள்ளவுள்ளனர்.  இந்த நட்சத்திர கலைவிழாவின் ஒரு பகுதியாக கிரிக்கெட் மற்றும் கால்பந்து போட்டிகள் நடைபெறவுள்ளது.  சூர்யா, விஷால், கார்த்தி, ஜெயம் ரவி, ஜீவா ஆகியோர் தலைமையிலான ஆறு கிரிக்கெட் அணிகளுக்குள் போட்டிகள் நடைபெறும், அதேபோல் மலேசிய நடிகர்கள் பங்கேற்கும் கால்பந்து போட்டி ஒன்றும் நடைபெறவுள்ளது. அதில் மலேசிய நடிகர்கள் ஒர் அணியிலும் தமிழ் சினிமா நடிகர்கள் ஒர் அணியிலும் பிரிந்து மோதவுள்ளார்கள். இந்நிகழ்ச்சியை மலேசிய அரசின் உதவி மற்றும் ஒத்துழைப்புடன் நடைபெறவுள்ளது

இந்த நட்சத்திர கலைவிழா வின் அறிமுக விழா சமீபத்தில் மலேசியாவில் உள்ள மலேசிய புக்கிஜாலி அரங்கில் நடந்தது. இந்த விழாவில் மலேசிய விளையாட்டுத்துறை துணை அமைச்சர் டத்தோ சரவணன், முதல் டிக்கெட் விற்பனையை துவக்கி வைத்தார். இந்த நிகழ்ச்சியில் தென்னிந்திய திரைப்பட நடிகர் சங்கத்தின் தலைவர் நாசர், கார்த்தி, கருணாஸ், பூச்சி முருகன், உள்பட பலர் கலந்துகொண்டு நிகழ்ச்சி பற்றிய அறிவிப்பை அறிவித்தார்கள்.

மேலும் நடிகர் சங்க நிர்வாகிகள் மலேசிய பிரதமர் நஜீப் ரசாக்கை சந்தித்து நட்சத்திர விழாவில் கலந்து கொள்ள அழைப்பு விடுத்தனர். அந்த அழைப்பை மலேசிய பிரதமர் ஏற்றுள்ளதால் அவருடைய தலைமையில் மலேசிய புக்கிஜாலி அரங்கில் இவ்விழா நடைபெறவுள்ளது என்பது குறிப்பிடத்தக்கது.