నాగార్జున వెర్స‌స్ సమంత
- IndiaGlitz, [Tuesday,May 22 2018]
అక్కినేని నాగార్జున, చెన్నై బ్యూటీ సమంత కలిసి ఇంత‌కుముందు ‘మనం’, ‘రాజుగారిగది2’ సినిమాల్లో పోటీ ప‌డి మరీ నటించారు. తొలిసారిగా.. ఇప్పడు వారి సినిమాలు పోటీ పడుతున్నాయి. ఆ వివరాల్లోకి వెళితే.. సంచలన దర్శకుడు రాంగోపాల్ వర్మ దర్శకత్వంలో నాగార్జున హీరోగా నటించిన సినిమా ‘ఆఫీసర్’. దాదాపు 25 సంవత్సరాల తర్వాత వీరి కలయికలో వస్తున్న సినిమా కావడంతో.. ఈ చిత్రంపై భారీ అంచనాలే ఉన్నాయి. ఈ మూవీలో నాగ్ రఫ్ అండ్ టఫ్ పోలీస్ ఆఫీసర్‌గా కనిపించనున్నారు.
ఈ సినిమా జూన్ 1న ప్రేక్షకుల ముందుకు రానుంది. ఇదే తేదీకి తమిళ నటుడు విశాల్‌తో కలిసి సమంత నటించిన ‘అభిమన్యుడు’ (తమిళంలో విజ‌య‌వంత‌మైన ‘ఇరుంబుతిరై’కి అనువాద రూపం) చిత్రం విడుదల కానుంది. డెబ్యూ డైరెక్టర్ పి.ఎస్.మిత్రన్ తెరకెక్కించిన ఈ మూవీలో డాక్టర్ రతీదేవిగా సమంత కనిపించనుంది. ఇంతవరకు నాగ్, సామ్ కలిసి నటించిన రెండు సినిమాలు విజయాన్ని సొంతం చేసుకున్నాయి. ఇప్పుడు తొలిసారి పోటీ పడుతున్న వీరి సినిమాలు ఎటువంటి ఫలితాన్ని రాబ‌డ‌తాయో చూడాలి.