కింగ్ నాగార్జున, సంచలన దర్శకుడు రాంగోపాల్ వ‌ర్మ కల‌యిక‌లో ఓ చిత్రం తెర‌కెక్కుతున్న విష‌యం విదిత‌మే. ఈ సినిమాకి సంబంధించి ఏ ఒక్క విషయం బయటికి వచ్చినా.. అది అభిమానుల్లో ఆసక్తిని రేకెత్తిస్తోంది. ఈ మూవీ టైటిల్ ను, విడుదల తేదీని ఆదివారం ప్రకటించబోతున్నట్టు వర్మ తెలిపారు. అయితే వర్మ అభిమాన నటి శ్రీదేవి ఆకస్మిక మరణంతో ఈ కార్యక్రమాన్ని వాయిదా వేసారు.

ఇదిలా వుంటే.. ఇప్పుడు ఈ చిత్రం టైటిల్ కు సంబంధించి ఆసక్తికరమైన విషయమొకటి చక్కర్లు కొడుతోంది. నాగార్జున పోలీస్ ఆఫీసర్‌గా నటిస్తున్న ఈ చిత్రానికి ఆఫీసర్` అనే టైటిల్‌ను ఖాయం చేసారని సమాచారం. దీంతో పాటు గన్`, సిస్ట‌మ్‌` పేర్లు పరిశీలనలోకి వచ్చాయని.. ఆఫీసర్` టైటిల్ అయితే బాగుంటుందని చిత్ర యూనిట్ భావించిందని కథనాలు వినిపిస్తున్నాయి. ఈ వారంలోనే టైటిల్‌తో పాటు విడుదల తేదీని కూడా ప్రకటించనున్నారు వర్మ. ఈ చిత్రంతో మైరా సరీన్ కథానాయికగా పరిచయం అవుతున్న విషయం విదితమే.