నాగ్ , వర్మ.. తొలిసారిగా
- IndiaGlitz, [Wednesday,February 28 2018]
తెలుగు తెరపై సంచలనం సృష్టించిన కాంబినేషన్‌లలో క‌థానాయ‌కుడు నాగార్జున, ద‌ర్శ‌కుడు రాంగోపాల్ వర్మ కాంబినేష‌న్‌ ఒకటి. ఇప్పటివరకు వీరి కాంబోలో నాలుగు సినిమాలు (అందులో ఒకటి హిందీ చిత్రం 'షివ') విడుదలయ్యాయి. ప్రస్తుతం ఐదో సినిమా రెడీ అవుతోంది. ఆ చిత్ర‌మే 'ఆఫీస‌ర్‌'. అయితే.. ఈ సినిమాకి సంబంధించి రిలీజ్ టైం విషయంలో.. గ‌త నాలుగు చిత్రాలకి భిన్నంగా వెళుతున్నారు.
కాస్త వివరాల్లోకి వెళితే..
వీరి కలయికలో వచ్చిన తొలి చిత్రం శివ' అక్టోబర్(1989)లో విడుదల కాగా.. ఇక హిందీలో ఇదే పేరుతో పునఃనిర్మాణం చేసిన చిత్రం 1990, డిసెంబర్‌లో విడుదలైంది. అలాగే.. 1992 సెప్టెంబర్ నెల‌లో అంతం', 1994 జనవరి నెల‌లో గోవిందా గోవిందా' చిత్రాలు విడుదలయ్యాయి. అయితే.. ఇప్పుడు మొదటిసారిగా వేసవిని టార్గెట్ చేస్తూ వీరి కలయికలో రాబోతున్న ఐదో సినిమాను విడుదల చేయడానికి ప్లాన్ చేస్తున్నారు. మే 25న 'ఆఫీస‌ర్‌'ను ప్రేక్షకుల ముందుకు తీసుకురాబోతున్నారు. మొదటిసారిగా వేసవిని టార్గెట్ చేసుకుని వ‌స్తున్న ఈ ఇద్ద‌రి కాంబినేష‌న్‌.. బాక్సాఫీస్ వ‌ద్ద ఎలాంటి విజయాన్ని నమోదు చేస్తుందో చూడాలి.