ట్రెండ్ సెట్టింగ్ మూవీ శివ‌తో సంచ‌ల‌నం సృష్టించిన కాంబినేష‌న్ కింగ్ నాగార్జున‌, ద‌ర్శ‌కుడు రామ్‌గోపాల్ వ‌ర్మ‌ది. ఆ త‌రువాత వీరి కాంబినేష‌న్‌లో వ‌చ్చిన అంతం, గోవిందా గోవింద నిరాశ‌ప‌రిచినా.. మ‌ళ్లీ ఈ ఇద్ద‌రి కాంబినేష‌న్‌లో సినిమా ఎప్పుడు వ‌స్తుందా అని అభిమానులు ఆశ‌గా ఎదురుచూశారు.

దాదాపు 24 ఏళ్ల త‌రువాత వీరి క‌ల‌యిక‌లో మ‌రో సినిమా రానుంది. ఇంకా పేరు నిర్ణ‌యించ‌ని ఈ సినిమాలో నాగ్ పోలీస్ ఆఫీస‌ర్‌గా క‌నిపించ‌నున్నారు. యాక్ష‌న్ థ్రిల్ల‌ర్‌గా తెర‌కెక్క‌నున్న ఈ సినిమాని న‌వంబ‌ర్ 20న అన్న‌పూర్ణ స్టూడియోస్‌లో ప్రారంభించ‌నున్నారు.

కేవ‌లం ఐదు నెల‌ల్లో ఈ సినిమాకి సంబంధించిన షూటింగ్‌, పోస్ట్ ప్రొడ‌క్ష‌న్ ని పూర్తి చేసి.. ఏప్రిల్ 20న ఈ సినిమాని విడుద‌ల చేయ‌నున్నార‌ని టాలీవుడ్ వ‌ర్గాలు పేర్కొంటున్నాయి. ఇందులో నాగార్జున స‌ర‌స‌న ట‌బు హీరోయిన్‌గా న‌టించ‌నుంద‌ని ఆ మ‌ధ్య వార్త‌లు వినిపించాయి.. అయితే వ‌ర్మ ఈ విష‌యాన్ని ఖండించారు.

వ‌ర్మ స్వ‌యంగా నిర్మించ‌నున్న ఈ చిత్రం.. శివలాగా మ‌రో ట్రెండ్ సెట్టింగ్ మూవీ అవుతుంద‌ని చిత్ర వ‌ర్గాలు పేర్కొంటున్నాయి.