అలనాటి మేటినటి సావిత్రి జీవితకథ ఆధారంగా రూపుదిద్దుకున్న బయోపిక్ ‘మహానటి’ ప్రేక్షకుల దగ్గరనుంచి సెలబ్రిటీల వరకు అందరి మన్ననలను పొందుతోంది. అంతేగాక బాక్సాఫీస్ వద్ద కాసుల వర్షం కురిపిస్తోంది. ఈ సినిమా ఇంతటి ఘన విజయం సాధించడంతో ఇప్పుడు తెలుగునాట మరిన్ని బయోపిక్ చిత్రాలు ముస్తాబవుతున్నాయి. వాటిలో భాగంగానే మహానటుడు ఎన్టీఆర్ బయోపిక్ ‘య‌న్.టి.ఆర్’.. అలాగే ఉమ్మడి ఆంధ్రప్రదేశ్ ముఖ్యమంత్రి వై.ఎస్.రాజశేఖర్ రెడ్డి జీవిత కథగా ‘యాత్ర’ బ‌యోపిక్ సినిమాలు త్వరలో సెట్స్ పైకి వెళ్లనున్నాయి.

ఈ నేపథ్యంలో మరో మహానటుడు ఏఎన్నార్ బయోపిక్‌ను కూడా తెరకెక్కిస్తున్నట్టు ఎన్నో ఊహాగానాలు వినిపించాయి. అయితే ఈ విషయమై ఏఎన్నార్ తనయుడు అక్కినేని నాగార్జున స్పందిస్తూ.. “బయోపిక్‌ను తెరకెక్కించాలంటే జీవితంలో ఎత్తు పల్లాలు ఉండాలి. కాని నాన్నగారి జీవితంలో అన్నీ ఎత్తులే.. పల్లాలనేవే లేవు. అందుకే ఆయన కథ సినిమాకు పనికిరాదు” అని అంటూనే.. ఏఎన్నార్ జీవితం పుస్తక రూపంలో వస్తే బాగుంటుందని నాగ్ అన్నారు.