ఆగ‌స్టులో నాగ్, నాని మల్టీస్టారర్?
- IndiaGlitz, [Wednesday,April 18 2018]
కింగ్ నాగార్జున, నేచురల్ స్టార్ నాని హీరోలుగా ఓ మల్టీస్టారర్ మూవీ రూపొందుతున్న విషయం తెలిసిందే. వైజయంతీ మూవీస్ బ్యానర్‌పై ప్రముఖ నిర్మాత అశ్వ‌నీదత్ నిర్మిస్తున్న ఈ చిత్రానికి శ్రీరామ్‌ ఆదిత్య దర్శకత్వం వహిస్తున్నారు. నాగ్ సరసన ఆకాంక్ష సింగ్‌ హీరోయిన్‌గా నటిస్తుండగా.. నానికి జోడిగా రష్మిక మందన్న న‌టిస్తోంది. అవసరాల శ్రీనివాస్‌, సంపూర్ణేష్‌ బాబు త‌దిత‌రులు ముఖ్యపాత్రల్లో నటిస్తున్నారు.
అశ్వ‌నీదత్ ఆస్థాన సంగీత దర్శకుడు మణిశర్మ సంగీత సారథ్య బాధ్యతలను నిర్వర్తించనున్నారు. ఇదిలా ఉంటే.. ఇప్పటికే తొలి షెడ్యూల్‌ను పూర్తిచేసి.. ఇటీవలే రెండో షెడ్యూల్‌ను ప్రారంభించింది చిత్ర బృందం. ఈ షెడ్యూల్‌లో నాగ్‌పై కొన్ని సన్నివేశాలను చిత్రీకరించనున్నారు. ఈ షెడ్యూల్ నుంచి ఇద్దరు హీరోలూ సాధ్యమైనంత తొందరగా షూటింగ్ పార్టును పూర్తి చేయాలని నిశ్చ‌యించుకున్నారని సమాచారం. ఈ నేపథ్యంలో జూలై కల్లా చిత్రీకరణను పూర్తి చేసి.. ఆగష్టులో సినిమాని విడుదల చేసే ప్లాన్‌లో చిత్ర యూనిట్ ఉంద‌ని సమాచారం.