వినాయక చవితికి నాగ్, నాని మూవీ?
- IndiaGlitz, [Sunday,May 20 2018]
కింగ్ నాగార్జున, నేచురల్ స్టార్ నాని కథానాయకులుగా శ్రీరామ్‌ ఆదిత్య దర్శకత్వంలో ఓ మల్టీస్టారర్ మూవీ తెరకెక్కుతున్న విషయం తెలిసిందే. ఈ చిత్రాన్ని వైజయంతి మూవీస్ బ్యానర్‌పై ప్రముఖ నిర్మాత సి.అశ్వ‌నీదత్ నిర్మిస్తున్నారు. నాగ్ సరసన 'మ‌ళ్ళీ రావా' ఫేమ్‌ ఆకాంక్ష సింగ్‌ నాయికగా నటిస్తుండగా.. నాని జోడీగా 'ఛ‌లో' ఫేమ్‌ రష్మిక మందన్న కనిపించనున్నారు. అవసరాల శ్రీనివాస్‌, సంపూర్ణేష్‌ బాబు త‌దిత‌రులు ముఖ్యపాత్రల్లో నటిస్తున్నారు.
అశ్వ‌నీదత్ ఆస్థాన సంగీత దర్శకుడు “మెలోడీ బ్రహ్మ” మణిశర్మ ఈ సినిమాకి సంగీతమందిస్తున్నారు. ఇదిలా ఉంటే.. ప్రస్తుతం హైదరాబాద్‌లో ఒక కాలనీగా వేసిన సెట్‌లో ఈ సినిమాకి సంబంధించిన షూటింగ్ జరుగుతోంది. అవుట్ అండ్ అవుట్ కామెడీ ఎంట‌ర్‌టైన‌ర్‌గా రూపుదిద్దుకుంటున్న ఈ సినిమాని ఆగష్టు కల్లా పూర్తి చేసి.. వినాయక చవితి సందర్భంగా సెప్టెంబర్ 13న విడుదల చేయడానికి నిర్మాణ వర్గాలు ప్లాన్ చేస్తున్నాయి. దీనికి సంబంధించిన అధికారిక స‌మాచారం రావాల్సి ఉంది.