నాగార్జున మ‌ల‌యాళ చిత్రం అప్‌డేట్‌
- IndiaGlitz, [Wednesday,May 23 2018]
కింగ్ నాగార్జున ఓ మ‌ల‌యాళ చిత్రంలో న‌టిస్తున్నట్లు గ‌త కొంత‌కాలంగా వార్త‌లు వినిపిస్తున్న సంగ‌తి తెలిసిందే. మాలీవుడ్ సూపర్ స్టార్ మోహన్ లాల్ ప్రధాన పాత్ర పోషిస్తున్న ఈ చారిత్రాత్మక చిత్రం.. 16వ శతాబ్దానికి చెందిన కుంజలి మరక్కర్ IVగా పేరుగాంచిన మహమ్మద్ అలీ జీవిత కథగా తెరకెక్కుతోంది.
'మరక్కర్: ది లయన్ ఆఫ్ ది అరేబియన్ సీ' అనే పేరుతో తెర‌కెక్కుతున్న ఈ సినిమాలో బాలీవుడ్ నటులు సునీల్ శెట్టి, పరేష్ రావ‌ల్ ముఖ్య పాత్రల్లో కనిపించనున్నారు.
భారీ బడ్జెట్‌తో రూపుదిద్దుకోబోతున్న ఈ చిత్రానికి ప్రియదర్శన్ దర్శకత్వం వహించనున్నారు. కాగా.. 16వ శతాబ్దంలో పోర్చుగీస్ వారిపై కుంజలి మరక్కర్ సైన్యం.. నీటి మీద సాగే యుద్ధ నౌకలతో తిరుగుబాటు చేసేవారు. ఈ నేప‌థ్యంలో ఈ సినిమాలోని ఆ సన్నివేశాలను కళ్ళకి కట్టినట్టు చూపించనున్నారు ద‌ర్శ‌కులు. అందుకోసం.. పోర్చుగీస్ వారి పాత్రల్లో కొంతమంది బ్రిటిష్ నటుల‌ను ఎంచుకున్నట్టు తెలుస్తోంది.
మలయాళంతో పాటు, తెలుగు, తమిళం, హిందీ భాషల్లో రూపొందుతున్న ఈ సినిమా జూలై నెల నుంచి సెట్స్ పైకి వెళ్లనుంది. మోహన్ లాల్ సహనిర్మాతగా వ్యవహరించనున్న ఈ చిత్రానికి సంబంధించి మరిన్ని వివరాలు త్వరలోనే వెల్లడి కానున్నాయి.