కింగ్ నాగార్జున‌కి డిసెంబ‌ర్ నెల అచ్చొచ్చిన నెల అనే చెప్పాలి. క‌థానాయ‌కుడిగానే కాకుండా, నిర్మాత‌గానూ ఈ నెల‌లో నాగ్ నుంచి వ‌చ్చిన సినిమాలు విజ‌యం సాధించాయి. 'మ‌న్మ‌థుడు' (2002), 'స‌త్యం'(2003), 'మాస్'(2004) చిత్రాలతో వరుస‌గా మూడేళ్ల పాటు డిసెంబ‌ర్ ద్వితీయార్థంలో సినిమాలు విడుద‌ల చేయ‌డ‌మే కాకుండా.. విజ‌యాలు కూడా అందుకుని నిర్మాత‌గా హ్యాట్రిక్ హిట్స్ సొంతం చేసుకున్నారు నాగ్‌.

ఈ డిసెంబ‌ర్‌ నెల‌లోనే క‌థానాయ‌కుడిగా నాగ్ నుంచి వ‌చ్చిన మ‌రో చిత్రం 'కింగ్‌'. కామాక్షి క‌ళా మూవీస్ ప‌తాకంపై రూపొందిన ఈ చిత్రానికి శ్రీ‌ను వైట్ల ద‌ర్శ‌క‌త్వం వ‌హించారు. వినోదాత్మ‌కంగా రూపొందిన ఈ చిత్రంలో నాగ్ త‌న కామెడీ టైమింగ్‌తో ఆక‌ట్టుకున్నారు. త్రిష క‌థానాయిక‌గా న‌టించిన ఈ చిత్రంలో మ‌మ‌తా మోహ‌న్ దాస్‌, శ్రీ‌హ‌రి, గీత‌, బ్ర‌హ్మానందం, ఎమ్మెస్ నారాయ‌ణ త‌దిత‌రులు న‌టించారు.

ఓ ప్ర‌త్యేక గీతం కోసం అనుష్క‌, ఛార్మి, జెనీలియా, ప్రియ‌మ‌ణి, స్నేహ ఉల్లాల్‌, కామ్నా జెఠ్మ‌లానీ త‌ళుక్కున మెరిసారు. దేవిశ్రీ ప్ర‌సాద్ సంగీత‌మందించిన ఈ చిత్రం క‌మ‌ర్షియ‌ల్‌గా స‌క్సెస్ అయ్యింది. డిసెంబ‌ర్ 25, 2008న విడుద‌లైన 'కింగ్‌' నేటితో 9 వ‌సంతాల‌ను పూర్తిచేసుకుంటోంది.