టాలీవుడ్‌లో తక్కువ టైంలోనే మినిమం గ్యారంటీ హీరోగా పేరు తెచ్చుకున్న హీరో రాజ్ తరుణ్. అలాగే తనకంటూ అభిమానులను కూడా సంపాదించుకున్నాడు ఈ యువ క‌థానాయ‌కుడు. కాగా, రాజ్ త‌రుణ్ నటించిన 'రాజుగాడు', 'రంగుల రాట్నం' చిత్రాలు రిలీజ్ కి సిద్ధంగా ఉన్నాయి. ఈ హీరోని 'ఉయ్యాలా జంపాలా' సినిమాతో ఇండస్ట్రీకి పరిచయం చేసింది కింగ్ నాగార్జున. ఇప్పుడు సంక్రాంతికి విడుదల కానున్న రాజ్ తరుణ్ అప్ కమింగ్ మూవీ 'రంగుల రాట్నం'కి కూడా నాగార్జున నిర్మాత‌గా వ్య‌వ‌హ‌రిస్తున్నారు.

కేవలం హీరో మీద, అలాగే ఈ సబ్జెక్టు మీద ఉన్న నమ్మకంతో అన్నపూర్ణ స్టూడియోస్ పై నాగార్జున ఈ చిత్రాన్ని నిర్మించారు. తాజాగా వినిపిస్తున్న క‌థ‌నాల ప్ర‌కారం.. ఈ మూవీని దాదాపు రూ.5 కోట్ల బ‌డ్జెట్‌తో తెరకెక్కించార‌ని తెలిసింది. ఒక‌విధంగా చెప్పాలంటే.. రాజ్ తరుణ్ కెరీర్లోనే ఇది అత్యంత భారీ సినిమా. ఈ చిత్రంలో రాజ్ తరుణ్ మూడు సార్లు పెళ్ళిళ్ళు చేసుకునే పరిస్థితి వస్తుంది. అది ఎందుకు? అని తెలియాలంటే జనవరి 13 వరకు వేచి ఉండాల్సిందే.