‘మా’ అసోసియేషన్ ఎన్నికలపై మెగా బ్రదర్ నాగబాబు ఆసక్తికరమైన వ్యాఖ్యలు చేశారు. ఆయన తన మద్దతు నరేశ్, రాజశేఖర్ ప్యానల్‌కు ఉంటుందని ప్రకటించారు. శుక్రవారం రాత్రి మీడియాతో మాట్లాడిన ఆయన.. తాను ఈ ప్యానెల్‌‌కు సపోర్ట్ చేస్తున్నాననే విషయాలను కూడా నిశితంగా వివరించారు. ‘మా’ అధ్యక్ష పదవి అనేది ఒక్కరు ఒక్కసారి మాత్రమే చేయాలని.. రెండోసారి చేయడం తనకు నచ్చదని ఆయన స్పష్టం చేశారు. ప్రతి ఒక్కరికి కచ్చితంగా అవకాశం ఇవ్వాలని.. అందుకే తాను నరేశ్, రాజశేఖర్‌కు సపోర్ట్ చేస్తున్నానన్నారు. తాను అధ్యక్షుడిగా ఉన్నపుడు కూడా రెండోసారి చేయ‌మంటే చేయ‌న‌ని చెప్పిన విషయాన్ని ఈ సందర్భంగా ఆయన గుర్తు చేశారు.

మహిళకు చోటిచ్చారు!

అయితే ఈ ప్యానెల్లో జీవితకు మంచి హోదా ఇస్తున్నారని.. ఆడవాళ్లను గౌరవించుకోవడం మన బాధ్యత అని నాగబాబు చెప్పుకొచ్చారు. ఇప్పటివరకు మా అసోసియేషన్‌లో మహిళలకు తగిన పదవి ఇవ్వలేదని.. ఇప్పుడు నరేశ్ వర్గం అది చేస్తోంది కాబట్టి తాను ఈ ప్యానెల్‌కు సపోర్ట్ చేస్తున్నానన్నారు. వీళ్లు వచ్చి ఏదైనా కొత్తగా చేస్తారేమో.. వాళ్లకు ఎలాంటి కొత్త ఆలోచనలు ఉన్నాయేమో.. వాళ్లకు కూడా ఒక అవకాశం ఇచ్చి చూస్తే మంచిది క‌దా అని మద్దతిస్తున్నట్లు ఆయన తెలిపారు.

నరేశ్.. రాజశేఖర్ గురించి..

"గతంలో జనరల్ సెక్రటరీగా నరేష్ అద్భుతమైన పనితీరు కనబరిచారు.. కాబట్టి ఆయనకు మళ్లీ మద్దతిస్తున్నాను. ఎన్నో సినిమాల్లో హీరోగా నటించిన రాజశేఖర్.. అలాగే ఒకప్పటి జంధ్యాల సినిమాల‌తో పాటు ఇప్పటికీ నటిస్తున్న నరేశ్.. ఎన్నో సినిమాలు తెరకెక్కించి నటించిన జీవితకు నా మద్దతు ఇస్తున్నాను. గ‌త అసోసియేష‌న్ వ‌ర్గంతో నేను డిస‌ప్పాయింట్ అయ్యాన‌ని.. ఎవ‌రు ప‌డితే వాళ్లు వ‌చ్చి ‘మా’ అసోసియేష‌న్ గురించి నోటికొచ్చిన‌ట్లు మాట్లాడుతుంటే వాళ్లు చూస్తూ ఉన్నారు కానీ యాక్షన్ తీసుకోలేద‌ు. అందుకే ఈ ఒక్క విష‌యంలో నేను నిరాశ‌ప‌డ్డాన‌ు. మీడియా కూడా అప్పుడు ‘మా’ కు వ్యతిరేకంగా మాట్లాడితే న‌రేశ్, జీవిత ఇద్దరు మాట్లాడారు. ఈ సారి కొత్త వాళ్లకు అవ‌కాశం ఇస్తే వాళ్లేం చేస్తారో కూడా తెలుస్తుంది క‌దా.. అలా కాకుండా ముందే మీరు చేయ‌లేర‌ని చెప్పడం మంచిది కాద‌ు.

నరేశ్ ప్యానల్‌కు నా పర్సనల్ రిక్వెస్ట్..

"స్నేహం వేరు.. ‘మా’ అసోసియేషన్ సంక్షేమం వేరు. నేను ఇంత వరకు ఒక్కమాట కూడా చెప్పలేదు. మరి నా సపోర్ట్ ఎంత వరకు వీరి ప్యానల్‌కు ఉపయోగపడుతుందో చెప్పలేను కానీ, నా వైపు నుంచి 100 పర్సెంట్ సపోర్ట్ మాత్రం నరేష్ ప్యానల్‌కే. నాకు తెలిసిన వాళ్లందరికీ ఈ ప్యానల్‌కే ఓటు వేయమని చెబుతాను. మనస్ఫూర్తిగా నరేష్ ప్యానెల్ రావాలని కోరుకుంటున్నాను. ఈ ప్యానల్‌లో అంతా కొత్తవారు ఉన్నారు. శంకర్ రావుగారు, గౌతంరాజు, శివబాలాజీ, అలీ.. వీళ్లంతా ఈ ప్యానల్‌లో ఉన్నారు. వీళ్లంతా ఫ్రెష్. వీళ్లందరికీ అవకాశం ఇవ్వాలి. ఒకవేళ వీరు సరిగా చేయకపోతే.. 2 సంవత్సరాల తర్వాత ఎలాగూ తెలుస్తుంది. నరేష్ ప్యానల్‌కు నేను ఒక్కటే కోరుకుంటున్నాను. ఆర్టిస్ట్‌ల ఎంట్రీకి రేటు మాత్రం పెంచవద్దని కోరుతున్నాను. ఇది నా పర్సనల్ రిక్వెస్ట్. లాస్ట్ టైమే తగ్గించమని చెప్పాను. మీరు ఆ పని చేస్తారని నమ్ముతున్నాను" అని నాగబాబు చెప్పుకొచ్చారు. మొత్తానికి చూస్తే.. మెగా ఫ్యామిలీ నరేశ్ కు సపోర్ట్ చేస్తోంది గనుక.. నరేశ్ దాదాపు గెలిచిపోయినట్లేనని చెప్పుకోవచ్చు.