ఛలో` సినిమా ఇచ్చిన విజయోత్సాహంతో వరుసగా సినిమాలను ఓకే చేస్తూ ముందుకు సాగుతున్నారు యువ కథానాయకుడు నాగశౌర్య. కొత్త దర్శకుడు వెంకీ కుడుముల తనకి కెరీర్‌లో బెస్ట్ హిట్‌ను అందించారు. ఇప్పుడు నాగశౌర్య తదుపరి చిత్రాలను కూడా కొత్త దర్శకులైన శ్రీనివాస్ చక్రవర్తి, సాయి శ్రీరామ్ తెరకెక్కిస్తుండడం విశేషం.

కాస్త వివరాల్లోకి వెళితే.. నాగ‌శౌర్య హీరోగా శ్రీనివాస్ చక్రవర్తి దర్శకత్వంలో రూపుదిద్దుకోబోతున్న నర్తనశాల` సినిమా ఇప్పటికే స్క్రిప్ట్ పనులు పూర్తిచేసుకుంది. కామెడీ నేపథ్యంలో సాగే ఈ చిత్రాన్ని కూడా నాగశౌర్య హోమ్ బేన‌ర్‌ ఐరా క్రియేషన్స్ పతాకంపై నిర్మిస్తుండడం విశేషం. అంతేగాకుండా.. మార్చి నుంచి చిత్రీకరణ ప్రారంభించి దసరా పండుగ సందర్భంగా ఈ చిత్రాన్ని విడుదల చేయాలని నాగశౌర్య ప్లాన్ చేస్తున్నారు. అలాగే.. సాయి శ్రీరామ్ డైరెక్షన్లో చేయబోయే సినిమా ఇంకా కథా చర్చల్లోనే ఉంది. రొమాంటిక్ ఎంటర్‌టైన‌ర్‌గా తెరకెక్కబోయే ఈ మూవీ కూడా త్వరలోనే సెట్స్ పైకి వెళ్లనుందని సమాచారం.