దాన్ని టాటూగా వేయించుకున్న నాగ‌శౌర్య
- IndiaGlitz, [Tuesday,December 17 2019]
సాధార‌ణంగా టాటూలుగా మనకు న‌చ్చిన వ్య‌క్తుల పేర్లు వేసుకుంటాం. కొంద‌రు కొన్ని బొమ్మ‌ల‌ను టాటూలుగా వేయించుకుంటారు. ఆ బొమ్మ‌ల్లో కూడా చాలా అర్థాలుంటాయి. మనకు మనసుకు న‌చ్చిన పేర్ల‌ను టాటూలుగా వేయించుకునే వారిలో మనకు ఇష్ట‌మైన హీరో, హీరోయిన్లు కూడా ఉంటారు. అలాంటి వారిలో హీరో నాగ‌శౌర్య కూడా చేరారు. ఆస‌క్తిక‌ర‌మైన విష‌య‌మేమంటే నాగ‌శౌర్య తన సినిమా పేరుని తన టాటూగా వేయించుకున్నాడు.
ప్ర‌స్తుతం నాగ‌శౌర్య 'అశ్వథ్థామ' సినిమాతో బిజీగా ఉన్నాడు. ఈ సినిమాను జ‌న‌వ‌రి 31న ప్రేక్ష‌కుల ముందుకు తీసుకు రాబోతున్నాడు. ప‌క్కా యాక్ష‌న్ ఎంట‌ర్‌టైన‌ర్‌గా రూపొందుతోన్న ఈ సినిమాలో నాగ‌శౌర్య హీరోగా న‌టిస్తూనే సినిమాను నిర్మిస్తున్నాడు. ఇవీ కాకుండా ఈ సినిమాకు క‌థ కూడా శౌర్య‌నే రాయ‌డం విశేషం. అలాగే సినిమాలోని పాత్ర కోసం ఏకంగా సిక్స్ ప్యాక్ లుక్‌తో కూడా సిద్ధ‌మైపోయాడు.
ఇప్ప‌టి వ‌ర‌కు నాగ‌శౌర్య ఏ సినిమాకు ఇంత‌లా క‌ష్ట‌ప‌డ‌లేదు. అంత‌లా అశ్వథ్థామ మనసుకు చాలా ద‌గ్గ‌రైంది. అందుక‌నే ఆ సినిమా పేరుని తన ఎద‌పై ప‌చ్చ‌బొట్టుగా వేయించుకున్నాడు. ర‌మ‌ణ తేజ ద‌ర్శ‌క‌త్వంలో తెర‌కెక్కుతోన్న ఈ చిత్రంలో మెహ‌రీన్ హీరోయిన్‌గా న‌టిస్తుంది. ఐరా క్రియేష‌న్స్ బ్యాన‌ర్‌పై శంక‌ర్ ప్ర‌సాద్ స‌మ‌ర్ప‌ణ‌లో ఉషా ముల్పూరి ఈ చిత్రాన్ని నిర్మిస్తున్నారు.