‘‘ నా భార్యను పంపమన్నాడు’’.. రామకృష్ణ సెల్ఫీ వీడియో , వనమా రాఘవకు బిగుస్తోన్న ఉచ్చు
- IndiaGlitz, [Thursday,January 06 2022]
భద్రాద్రి కొత్తగూడెం జిల్లా పాల్వంచలో కుటుంబం ఆత్మహత్య ఘటన కీలక మలుపు తిరిగింది. రామకృష్ఱ కుటుంబం ఆత్మహత్యకు ప్రధాన కారణంగా భావిస్తోన్న కొత్తగూడెం ఎమ్మెల్యే వనమా వెంకటేశ్వరరావు కుమారుడు రాఘవేంద్ర చుట్టూ ఉచ్చు బిగుస్తోంది. ఈ నేపథ్యంలో తాజాగా రామకృష్ణ సెల్ఫీ వీడియో బయటకు వచ్చింది. అందులో తన నిర్ణయానికి దారితీసిన పరిస్థితులను ఆయన వివరించారు. ఆ సందర్భంగా రాఘవేంద్రరావుపై రామకృష్ణ తీవ్ర ఆరోపణలు చేశారు.
వనమా రాఘవ కారణంగా ఎన్నో కుటుంబాలు నాశనమయ్యాయి. అలాంటి దుర్మార్గులను రాజకీయంగా ఎదగనివ్వొద్దని ఆయన సూచించారు. డబ్బు రూపంలో ఎంత అడిగినా ఇచ్చేవాడిని.. కానీ ఏ భర్త కూడా వినకూడని మాటను రాఘవ అడిగారు. పిల్లలు లేకుండా తన భార్యను హైదరాబాద్‌‌కు ఒంటరిగా తీసుకురావాలని కోరాడంటూ రామకృష్ణ సంచలన వ్యాఖ్యలు చేశారు. నీ భార్యను నా దగ్గరికి పంపిస్తే నువ్వు అడిగిన పని చేసి పెడతా.. లేకపోతే ఎవ్వరూ నీకు సాయం చేయరని రాఘవ బెదిరించినట్లు ఆయన ఆరోపించారు. రాజకీయ, ఆర్థిక బలంతో పబ్బం గడుపుకోవాలని చూశారు... నేను ఒక్కడినే వెళ్లిపోతే నా భార్య, పిల్లలను వదిలిపెట్టరు. అందుకే నాతో పాటు వారినీ తీసుకెళ్తున్నా. అప్పుల్లో ఉన్న నాపై నా తల్లి, సోదరి కక్ష సాధించారు అని నాగ రామకృష్ణ సెల్ఫీ వీడియోలో వాపోయారు. ప్రస్తుతం ఈ వీడియో సోషల్ మీడియాలో చక్కర్లు కొడుతోంది.
కాగా.. నాగ రామకృష్ణ తన భార్య శ్రీలక్ష్మి, ఇద్దరు పిల్లలు సాహితి, సాహిత్యపై సోమవారం తెల్లవారుజామున పెట్రోల్‌ పోసి తానూ నిప్పటించుకున్నాడు. ఈ ఘటనలో అక్కడికక్కడే ముగ్గురు సజీవ దహనం కాగా.. 80శాతం గాయాలతో తీవ్రంగా గాయపడిన సాహితి ఆస్పత్రిలో మూడు రోజుల పాటు మృత్యువుతో పోరాడి బుధవారం కన్నుమూసింది. తొలుత ఈ కేసును ప్రమాదంగా, ఆత్మహత్యగా భావించారు. కానీ రామకృష్ణ రాసిన సూసైడ్ నోట్‌లో వనమా రాఘవేంద్రే అన్నింటికి కారణమని తేలడంతో పోలీసులు ఆయనపై కేసు నమోదు చేసి దర్యాప్తు చేస్తున్నారు. ప్రస్తుతం రాఘవ అజ్ఞాతంలోనే వున్నారు.