సొంత సంస్థ‌లో ‘మనం’, ‘రారండోయ్.. వేడుక చూద్దాం’ చిత్రాలతో పాటు.. బయట నిర్మాతల ‘ఏ మాయ చేశావే’, ‘100% లవ్’, ‘తడాఖా’, ‘ప్రేమమ్’ సినిమాలతో కూడా విజయాన్ని అందుకున్నారు నాగ చైతన్య. అయితే తెలుగు ఫిలిం ఇండస్ట్రీలో రెండు దిగ్గజ కుటుంబాల  (అక్కినేని.. దగ్గుబాటి) వారసుడైన‌ చైతు.. ఇప్పటివరకు మేనమామ (సురేష్ ప్రొడక్షన్స్) సంస్థ‌లో ఒక్క సినిమా కూడా చేయలేదు. ఆ మధ్య చైతు నటించిన ‘యుధ్ధం శ‌ర‌ణం’ని సురేష్ ప్రొడక్షన్స్ నిర్మించవలసి ఉండగా.. కొన్ని కారణాల వలన అది కార్యరూపం దాల్చలేదు.

అయితే.. ఇప్పుడు తొలిసారి చైతు సినిమాని సురేష్ ప్రొడక్షన్స్ నిర్మించబోతోందనే వార్తలు టాలీవుడ్ ఇండస్ట్రీలో హల్ చల్ చేస్తున్నాయి. ఆ వివరాల్లోకి వెళితే.. వెంకటేష్, చైతు కథానాయకులుగా కళ్యాణ్ కృష్ణ ఓ సినిమా తెరకెక్కిస్తున్నారనే వార్తలు ఆ మధ్య వినపడ్డాయి. కానీ కళ్యాణ్ కృష్ణ ఇప్పుడు ఈ ప్రాజెక్ట్ నుంచి తప్పుకోవడంతో.. ఆయన స్థానంలో బాబీ ఈ సినిమాని తెరకెక్కించనున్నారు. ఈ సినిమానే సురేష్ ప్రొడక్షన్స్ పతాకంపై సురేష్ బాబు నిర్మించనున్నారని సమాచారం. దీనిపై అధికారిక ప్రకటన వెలువడాల్సి ఉంది. అన్నీ అనుకున్నట్టు జరిగితే.. ఒక మేనమామ సురేష్ బాబు నిర్మాణంలో.. మరో మేనమామ వెంకటేష్‌తో కలిసి తెరను పంచుకున్న‌ట్ల‌వుతుంది చైతుకి.