యువ కథానాయకుడు నాగ చైతన్య, కేరళ కుట్టి అను ఇమ్మాన్యుయేల్ జంటగా నటిస్తున్న సినిమా ‘శైలజా రెడ్డి అల్లుడు’ (ప్రచారంలో ఉన్న పేరు). సీనియర్ నటీమణి రమ్యకృష్ణ టైటిల్ రోల్ పోషిస్తున్న ఈ సినిమాని యూత్‌ఫుల్ చిత్రాల దర్శకుడు మారుతి తెరకెక్కిస్తున్నారు. ప్రస్తుతం శరవేగంగా చిత్రీకరణ జరుపుకుంటున్న ఈ చిత్రం ఫస్ట్ లుక్ కోసం అక్కినేని అభిమానులు ఎంతో ఆసక్తితో ఎదురు చూస్తున్నారు.

వారి ఎదురు చూపులకు తెరదించుతూ.. జూలై 1న ఈ సినిమా టైటిల్ లోగోతో కూడిన ఫస్ట్ లుక్‌ను రిలీజ్ చేయడానికి చిత్ర బృందం సన్నాహాలు చేస్తోంది. చైతూ సింగల్ స్టిల్‌తోనే ఫస్ట్ లుక్ ఉంటుందని సమాచారం. అలాగే జూలై రెండు లేక మూడో వారంలో టీజర్‌ను కూడా విడుదల చేసే దిశగా చిత్ర యూనిట్ ప్లాన్ చేస్తోంది. ఇదిలా ఉంటే.. జూలై 25వ తేదీ నాటికి పాటలతో పాటు టాకీ పార్టును కూడా పూర్తి చేసే ప‌నిలో చిత్ర బృందం ఉండగా.. ఇప్పటికే చైతు తన పాత్రకి చాలా వరకు డబ్బింగ్ కూడా చెప్పేయడం విశేషం. సితార ఎంటర్‌టైన్‌మెంట్స్ నిర్మిస్తున్న ఈ సినిమా ఆగష్టు 31న ప్రేక్షకుల ముందుకు రానుంది.