నాగ‌చైత‌న్య తదుపరి ఖ‌రారైందోచ్‌!!
- IndiaGlitz, [Saturday,December 14 2019]
ఈ శుక్ర‌వారం 'వెంకీమామ' విడుద‌లైంది. తొలి రోజున ప్ర‌పంచ వ్యాప్తంగా రూ.16 కోట్ల గ్రాస్ క‌లెక్ష‌న్స్ వ‌చ్చాయి. ఈ సినిమా విడుద‌లై ఒక రోజు అయ్యిందో లేదో.. చైత‌న్య తదుపరి సినిమాను ఖ‌రారు చేశారు. అధికారిక స‌మాచారం మేర‌కు నాగ‌చైత‌న్య త‌న తదుపరి చిత్రాన్ని ప‌రుశురాం ద‌ర్శ‌క‌త్వంలో చేయ‌బోతున్నాడు. 14 రీల్స్ ప్ల‌స్ బ్యాన‌ర్‌పై రామ్ ఆచంట, గోపీచంద్ ఆచంట ఈ చిత్రాన్ని నిర్మిస్తున్నారు. 'గ‌ద్ద‌ల‌కొండ గ‌ణేష్' వంటి విజ‌య‌వంత‌మైన చిత్రం తర్వాత 14 రీల్స్ బ్యాన‌ర్‌పై రూపొందుతోన్న చిత్ర‌మిది.
'గీత గోవిందం' వంటి రూ.100 కోట్ల వ‌సూళ్ల‌ను సాధించిన సినిమాను డైరెక్ట్ చేసిన ప‌రుశురాంకు వెంట‌నే సినిమాలు రాలేదు. ఆయ‌న తదుపరి సినిమా కోసం హీరోల చుట్టూనే గ‌ట్టిగానే తిరిగాడు. మ‌హేశ్‌, విజ‌య్ దేవ‌ర‌కొండ వంటి హీరోల చుట్టూ తిరిగినా ప‌రుశురాంను ఎవ‌రూ ప‌ట్టించుకోలేదు. అయితే ప‌రుశురాం ప‌ట్టువ‌ద‌ల‌ని విక్ర‌మార్కుడిలా త‌న క‌థ‌తో రీసెంట్‌గా నాగ‌చైత‌న్య‌ను క‌లిశాడు. చైతుకి క‌థ న‌చ్చ‌డంతో ఆయ‌న ఓకే చెప్పాడు. త్వ‌ర‌లోనే ఈ సినిమాకు సంబంధించిన ప్రీ ప్రొడ‌క్ష‌న్ ప‌నులు ప్రారంభం కానున్నాయి. త్వ‌ర‌లోనే ఈ సినిమాకు సంబంధించిన మ‌రిన్ని వివ‌రాలు తెలియ‌నున్నాయి.