భగ్న ప్రేమికుడు అంటే ముందుగా గుర్తుకొచ్చేది దేవదాసు. అటువంటి దేవదాసు పేరు వినగానే సినీ ప్రియుల మదిలో మెదిలే నటుడు అక్కినేని నాగేశ్వరరావు.  వాస్త‌వానికి దేవదాసు పాత్ర‌లో చాలా మంది నటించారు.. కాని ఆ పాత్రకి జీవం పోసి ప్రేక్షకుల మదిలో చెరగని ముద్ర వేసింది మాత్రం ఏఎన్నార్. ఏఎన్నార్‌కు మంచి పేరు తీసుకువచ్చిన ఆ పాత్రలో.. ఇప్పుడు ఆయన మనవ‌డు నాగ చైతన్య కనిపించబోతున్నార‌ని స‌మాచారం.

ఆ వివరాల్లోకి వెళితే.. నాగ్ అశ్విన్ దర్శకత్వంలో ‘మహానటి’ చిత్రం తెరకెక్కుతున్న‌ విషయం తెలిసిందే. సావిత్రి జీవిత కథగా రూపుదిద్దుకుంటున్న ఈ సినిమాలో..  సావిత్రిగా కీర్తి సురేష్ నటిస్తుండగా..  ఏఎన్నార్‌గా నాగ చైతన్య కనిపిస్తున్నారు. ఏఎన్నార్‌గా చైతు కనిపించే సన్నివేశాలు రెండూ లేదా మూడు మాత్రమే అని తెలుస్తోంది.

అందులో.. ఈ దేవదాసు లుక్‌తో క‌నిపించే సీన్‌ ఒకటి ఉంటుంద‌ట‌. అప్పటి దేవదాసు పాత్రలో.. ఏఎన్నార్ చేతిలో ఏ విధంగా అయితే మందు సీసా, మెడలో కండువా, పక్కన కుక్క ఉన్నాయో.. ఇప్పుడు అదే గెట‌ప్‌తో ఆయన మనవ‌డు చైతు కూడా కనిపించబోతున్నారు.

ఈ సినిమాకి సంబంధించి చైతు ఫస్ట్ లుక్‌ను కూడా ఈ గెట‌ప్‌లోనే విడుదల చేయాలని చిత్ర బృందం ఆలోచిస్తోంద‌ట‌.  దేవదాసుగా చైతుని వెండితెరపై చూడాలంటే మాత్రం.. మే 9 వరకు వేచి చూడ‌క తప్పదు.