நடிகர் சங்கத்தின் தீபாவளி பரிசு. உறுப்பினர்கள் மகிழ்ச்சி
- IndiaGlitz, [Monday,November 02 2015]
சமீபத்தில் நடிகர் சங்கத்தில் புதியதாக பதவியேற்ற நாசர், விஷால் உள்பட அனைத்து நிர்வாகிகளும் ஆக்கபூர்வமாக பல்வேறு நடவடிக்கைகளில் ஈடுபட்டு வருகின்றனர். இந்நிலையில் தீபாவளி பரிசாக ரஜினி, கமல் உள்பட அனைத்து நடிகர் சங்க உறுப்பினர்களுக்கும் சங்க செலவில் தீபாவளி பரிசு வழங்க முடிவு செய்யப்பட்டுள்ளது.
ஆண்களுக்கு வேட்டி, பெண்களுக்கு சேலை மற்றும் அத்துடன் ஒரு பை இனிப்பு அடங்கிய பரிசுப்பொருட்கள் அனைத்து உறுப்பினர்களின் வீட்டிற்கே சென்று கொடுக்க ஏற்பாடுகள் செய்யப்பட்டுள்ளது. இதனால் நடிகர் சங்கத்தில் உறுப்பினர்களாக இருக்கும் நாடக நடிகர்கள் உள்பட 3500 பேர்களும் பயனடைவர். இதனால் நடிகர் சங்க உறுப்பினர்கள் அனைவரும் மகிழ்ச்சி அடைந்துள்ளதாக கூறப்படுகிறது.
மேலும் நடிகர் சங்கத்தில் உள்ள நிர்வாகிகள் பத்து பேர் தனி குழுக்களாக மாவட்ட வாரியாக பிரிக்கப்பட்டு அனைத்து மாவட்டங்களுக்கும் சென்று அங்குள்ள நாடக நடிகர், நடிகைகளை நேரில் சந்தித்து அவர்களது வாழ்வாதாரம் பற்றியும் ,வருமானம் மற்றும் அவர்களது தற்போதைய நிலை , செய்யும் தொழில் போன்றவைகளை நேர்த்தியாக கணக்கெடுத்து தலைமைக்கு தெரிவிக்கும் வகையில் ஏற்ப்பாடுகள் செய்யப்பட்டுள்ளது. இந்த பணி வரும் தீபாவளி பண்டிகைக்கு பின் துவங்கவுள்ளதாகவும் கணக்கெடுப்பிற்கு பின்னர் உதவி தேவைப்படுபவர்களுக்கு உடனடியாக நடிகர் சங்கத்தின் சார்பில் வேண்டிய உதவிகள் செய்யப்படவுள்ளதாகவும் கூறப்படுகிறது.