2வது ஆண்டாக தொடர்கிறது நடிகர் சங்கத்தின் தீபாவளி பரிசு
- IndiaGlitz, [Saturday,October 22 2016]
தென்னிந்திய திரைப்பட நடிகர் சங்கத்தின் புதிய உறுப்பினர்கள் நாசர் தலைமையில் கடந்த ஆண்டு பதவியேற்ற நிலையில் கடந்த ஆண்டு தீபாவளி திருநாளை அனைத்து நடிகர், நடிகைகளும் சிறப்பாக கொண்டாடும் வகையில் அனைத்து உறுப்பினர்களுக்கும் துணிமணிகள், இனிப்புகள் கொண்ட தீபாவளி பரிசு வழங்கப்பட்டது.
இந்நிலையில் இந்த ஆண்டும் அதே மாதிரி தீபாவளி பரிசு வழங்க சங்க நிர்வாகிகள் முடிவு செய்துள்ளனர். வெளியூர் உறுப்பினர்களுக்கு சங்கத்தின் துணை தலைவர் பொன்வண்ணன் தலைமையில் செயற்குழு உறுப்பினர்கள் ஸ்ரீமன், உதயா, ஹேமசந்திரன், எம்.ஏ.பிரகாஷ் ஆகியோர்கள் மேற்பார்வையில் இன்று பரிசுகள் அனுப்பி வைக்கப்பட்டது.
சென்னையில் தீபாவளி பரிசுகள் வழங்கும் விழா வரும் 23ஆம் தேதி ஞாயிறு அன்று பகல் 11 மணிக்கு தென்னிந்திய நடிகர் சங்கத்தின் தலைவர் திரு.நாசர் தலைமையில் தி.நகரிலுள்ள நடிகர் சங்கம் வளாகத்தில் நடைபெற உள்ளது. இந்த விழாவில் மூத்த நடிகர், நடிகைகள், சங்க நிர்வாகிகள் கலந்து கொண்டு சிறப்பிக்க உள்ளார்கள்.