கருணாநிதி, விஜயகாந்துடன் நடிகர் சங்க நிர்வாகிகள் சந்திப்பு.
- IndiaGlitz, [Monday,November 23 2015]
தென்னிந்திய நடிகர் சங்கத்திற்கு புதியதாக தேர்வு செய்யப்பட்ட தலைவர் நாசர், பொதுச்செயலாளர் விஷால், பொருளாளர் கார்த்தி மற்றும் துணைத்தலைவர்கள் கருணாஸ், பொன்வண்ணன் ஆகியோர்கள் சமீபத்தில் தமிழக முதல்வர் ஜெயலலிதா அவர்களை நேரில் சந்தித்ததை அடுத்து நேற்று அதே நிர்வாகிகள் திமுக தலைவர் கருணாநிதி அவர்களை அவரது வீட்டில் மரியாதை நிமித்தமாக சந்தித்தனர்
கருணாநிதியை சந்தித்த பின்னர் நிருபர்களிடம் பேசிய நடிகர் சங்க தலைவர் நாசர், மூத்த கலைஞர் என்ற முறையில், மரியாதை நிமித்தமாக கருணாநிதியை சந்தித்ததாகவும், ஆர்ப்பாட்டம் இன்றி, அமைதியாக செயல்படுமாறு, அவர் தங்களுக்கு அறிவுரை வழங்கியதாகவும் தெரிவித்தார்.
கருணாநிதியை அடுத்து முன்னாள் நடிகர் சங்க தலைவர் விஜயகாந்த் அவர்களையும் நடிகர் சங்க நிர்வாகிகள் சந்தித்து பேசினர். இந்த சந்திப்பில் விஜய்காந்த் அவர்கள் மூவாயிரத்திற்கும் மேற்பட்ட உறுப்பினர்களை கொண்ட நடிகர் சங்கத்தை நிர்வகிப்பது எப்படி என்பது தொடர்பாக நடிகர் சங்கத்தின் புதிய நிர்வாகிகளுக்கு ஆலோசனை வழங்கியதாக கூறப்படுகிறது.
இதனையடுத்து மருத்துவமனையில் சிகிச்சை பெற்று வரும் பழம்பெரும் நடிகர் 'சோ' அவர்களை சந்தித்த நடிகர் சங்க நிர்வாகிகள் அவருடைய உடல்நலம் குறித்து விசாரித்தனர்.
விரைவில் நடிகர் ரஜினிகாந்தை சந்திக்க உள்ளதாக கூறிய நாசர், மழையால் பாதிக்கப்பட்டவர்களுக்கான நிவாரண பொருட்களை நடிகர் சங்கம் மூலமாக கடலூருக்கு அனுப்பியுள்ளதாகவும் செய்தியாளர்களிடம் கூறினார்.