நடிகர் சங்கம் தேர்தலை நிறுத்த உத்தரவு: திரையுலகில் பரபரப்பு
- IndiaGlitz, [Wednesday,June 19 2019]
நடிகர் சங்க தேர்தல் வரும் 23ஆம் தேதி நடத்த திட்டமிட்டிருந்த நிலையில் இந்த தேர்தலை உடனடியாக நிறுத்த மாவட்ட பதிவாளர் அலுவலகம் உத்தரவிட்டுள்ளது. இதனையடுத்து தேர்தல் வரும் 23ஆம் தேதி நடைபெறாது என தெரிகிறது.
வாக்காளர் பட்டியலில் குளறுபடி, தேர்தலை நடத்தும் நீதிபதி மீது சங்கரதாஸ் அணியினர் கூறிய குற்றச்சாட்டு, எந்த ஆண்டின் வாக்காளர் பட்டியலை வைத்து தேர்தல் நடத்துவது உள்பட பல குளறுபடிகள் இருப்பதால் இந்த குளறுபடிகளுக்கு முடிவு காணும் வரை தேர்தலை நடத்த கூடாது என மாவட்ட பதிவாளர் உத்தரவிட்டுள்ளார்.
சங்க நிர்வாகிகளின் பணிக்காலம் முடிந்த பின்னர் தேர்தல் நடத்தும் முடிவை நிர்வாகிகள் எடுத்துள்ளதாகவும் இது விதிமுறைகளுக்கு முரணானது என்றும் தேர்தலை நிறுத்துவதற்கு இதுவும் ஒரு காரணமாக உள்ளது என்றும் கூறப்படுகிறது.
சற்றுமுன்னர் நடிகர் சங்க தேர்தல் விவகாரம் குறித்து கவர்னருடன் பாண்டவர் அணியினர் ஆலோசனை செய்து வரும் நிலையில் திடீரென தேர்தல் ரத்து செய்யப்பட்டிருப்பது திரையுலகில் பெரும் பரபரப்பை ஏற்படுத்தியுள்ளது.