இதுதான் நான் நடித்த முதல் பாடல் காட்சி: டீன் ஏஜ் புகைப்படத்தை வெளியிட்ட நதியா!
- IndiaGlitz, [Saturday,March 20 2021]
கடந்த 1985ஆம் ஆண்டு இயக்குனர் பாசில் இயக்கத்தில் உருவான ’பூவே பூச்சூடவா’ என்ற திரைப்படத்தின் மூலம் தமிழில் அறிமுகமானவர் நடிகை நதியா. அதன் பின்னர் அவர் ரஜினிகாந்த் உட்பட பல முன்னணி நடிகர்களுடன் நடித்தார் என்பதும், தமிழ் திரையுலகில் 80களின் கனவுக்கன்னியாக இருந்தார் என்பதும் குறிப்பிடத்தக்கது.
இந்த நிலையில் தமிழில் ’பூவே பூச்சூடவா’ படம் தான் நதியாவுக்கு முதல் படம் என்றாலும் மலையாளத்தில் அதற்கு முன்னரே அவர் ஒரு சில படங்களில் நடித்துள்ளார். ‘நோக்கெத்தே தூரத்து கண்ணும் நட்டு’ என்ற மலையாளத் திரைப்படத்தில் தான் அவர் அறிமுகமானார் என்பதும் 1984ஆம் ஆண்டு வெளியான இந்தத் திரைப்படத்திற்காக அவருக்கு சிறந்த நடிகைக்கான பிலிம்பேர் விருது கிடைத்தது என்பதும் குறிப்பிடத்தக்கது
இந்த நிலையில் இந்த படத்தில் இடம்பெற்ற பாடல் ஒன்றில் தான் முதன் முதலாக நடித்ததாகவும், அப்போது எடுத்த புகைப்படத்தையும் அவர் தனது இன்ஸ்டாகிராம் பக்கத்தில் பதிவு செய்துள்ளார். டீன் ஏஜ் வயதில் நதியா இருக்கும் இந்த புகைப்படத்திற்கு ஏராளமான லைக்ஸ்களும் கமெண்ட்ஸ்களும் குவிந்து வருகிறது என்பது குறிப்பிடத்தக்கது
நடிகை நதியா தற்போது தெலுங்கு ரீமேக்கில் உருவாகி வரும் ‘த்ரிஷ்யம் 2’ திரைப்படத்தில் கீதா பிரபாகர் என்ற காவல்துறை அதிகாரி கேரக்டரில் நடித்து வருகிறார் என்பது குறிப்பிடத்தக்கது.