சரவணா ஸ்டோர் தொழிலதிபர் லெஜண்ட் சரவணன் அவர்கள் நடித்துள்ள ’தி லெஜண்ட்’ என்ற திரைப்படம் நாளை உலகம் முழுவதும் பிரமாண்டமாக வெளியாக உள்ளது. இந்த படம் உலகம் முழுவதும் 2,500 திரையரங்குகளில் தமிழ், தெலுங்கு, மலையாளம், கன்னடம் மற்றும் இந்தி என 5 மொழிகளில் ரிலீஸ் ஆக உள்ளது. இந்த படத்திற்கு மிகப்பெரிய எதிர்பார்ப்பு ஏற்பட்டுள்ளதால் இந்த படம் மிகப்பெரிய வெற்றி அடையும் என்று கூறப்படுகிறது.

இந்த நிலையில் தமிழகம் மட்டுமின்றி அனைத்து மாநிலங்களிலும் வெளிநாடுகளிலும் சென்று படக்குழுவினர் இந்த படத்தை புரமோஷன் செய்து வருகின்றனர். அந்த வகையில் நேற்று கேரளாவில் நடந்த புரமோஷனின் போது செய்தியாளர்கள் கேட்ட பல கேள்விகளுக்கு சுவராசியமாக சரவணன் பதில் அளித்தார்.

அப்போது அடுத்த படத்திலும் நீங்கள் சூப்பர் ஹீரோவாக நடிப்ப்பீர்களா? என்று கேட்ட போது கண்டிப்பாக அடுத்த படத்திலும் சூப்பர் ஹீரோவாக நடிப்பேன் என்றும், அதே நேரத்தில் அடுத்த படம் சர்வதேச அளவில் எடுக்க உள்ளதாகவும் அவர் தெரிவித்துள்ளார்.

’தி லெஜண்ட்’ திரைப்படத்தை பான் - இந்தியா திரைப்படமாக வெளியிடும் லெஜண்ட் சரவணன் அடுத்ததாக பான் - வேர்ல்டு திரைப்படமாக எடுக்க இருப்பதாக கூறி இருப்பது ஆச்சரியத்தை ஏற்படுத்தி உள்ளது. இதனை அடுத்து லெஜண்ட் சரவணனின் அடுத்த படத்தை இயக்கப் போவது யார் என்ற கேள்வி தற்போது கோலிவுட் திரையுலகில் எழுந்துள்ளது.