பிரமாண்ட இயக்குனர் ஷங்கர் படத்தில் நடித்தவர் தற்போது அவரது படத்திற்கு இசை அமைக்க இருப்பதாக தகவல்கள் வெளிவந்துள்ளன.

ஷங்கர் இயக்கும் பெரும்பாலான படங்களுக்கு ஆஸ்கார் நாயகன் ஏஆர் ரகுமான் தான் இசையமைத்துள்ளார் என்பதும், ஓரிரு படங்களுக்கு மட்டும் ஹாரிஸ் ஜெயராஜ் இசையமைத்துள்ளார் என்பதும் குறிப்பிடத்தக்கது.

இந்தநிலையில் ஷங்கர் இயக்கத்தில் ராம்சரண் தேஜா நடிப்பில் உருவாகவிருக்கும் திரைப்படத்திற்கு ஏஆர் ரகுமான் இசை அமைக்கவில்லை என்றும் இந்த படத்திற்கு தமன் இசையமைக்க இருப்பதாகவும் தகவல்கள் வெளிவந்துள்ளன.

ராம் சரண் தேஜா தெலுங்கு திரையுலகின் முன்னணி நடிகர் என்பதால் தெலுங்கு திரையுலகின் முன்னணி இசையமைப்பாளராக இருக்கும் தமன் தான் இசையமைப்பாளர் என படக்குழுவினர் முடிவு செய்திருப்பதாகவும் இது குறித்த அதிகாரப்பூர்வ அறிவிப்பு விரைவில் வெளியாகும் என்றும் கூறப்படுகிறது.

இசையமைப்பாளர் தமன், ஷங்கர் இயக்கிய ’பாய்ஸ்’ என்ற திரைப்படத்தில் நாயகன் சித்தார்த்தின் நண்பர்களில் ஒருவராக நடித்தவர் என்பது குறிப்பிடத்தக்கது. ஷங்கர் படத்தில் முக்கிய கேரக்டரில் நடித்த தமன் இப்போது அவரது படத்திற்கு இசையமைப்பாளராகி இருப்பது பெரும் ஆச்சரியத்தை ரசிகர்களுக்கு ஏற்படுத்தி உள்ளது.