கோலிவுட் திரையுலகில் கடந்த சில வருடங்களாக இளம் இசையமைப்பாளர்களின் அறிமுகம் அதிகமாகி, இசையுலகில் வெற்றி பெற்று வருகின்றனர். அந்த வகையில் கடந்த 2014ஆம் ஆண்டு 'வாயை மூடி பேசவும்' என்ற படத்தில் அறிமுகமாகி அதன் பின்னர் 'சதுரங்க வேட்டை', 'முண்டாசுப்பட்டி', 'ஜோக்கர்', 'பா.பாண்டி', 'விஐபி 2', 'மெஹந்தி சர்க்கஸ்' உள்பட பல திரைப்படங்களுக்கு இசையமைத்த இளம் இசையமைப்பாளர் சீன்ரோல்டன்.

இவர் இந்த ஆண்டு இசையமைத்த 'ராட்சசி' திரைப்படம் மிகப்பெரிய வெற்றியை பெற்றது என்பது நினைவிருக்கலாம். இந்த நிலையில் சீன்ரோல்டன் - சுதா தம்பதியினர்களுக்கு இன்று பெண் குழந்தை பிறந்துள்ளது. தாயும் சேயும் நலமுடன் இருப்பதாக தகவல்கள் வெளிவந்துள்ளது.

சீன்ரோல்டன் வீட்டிற்கு வந்த புதுவரவான குட்டி தேவதைக்கு திரையுலகினர் பலர் வாழ்த்து தெரிவித்து வருகின்றனர். இயக்குனர் ராஜூமுருகன் தனது சமூக வலைத்தள பக்கத்தில், 'இசைத் தோழன் ஷான் ரோல்டன் - சுதா இணையருக்கு குட்டி ஏஞ்சல் வந்திருக்கிறாள். வாழ்த்துகள் ஷானப்பா' என்று தெரிவித்துள்ளார். அவருக்கு சீன்ரோல்டன் நன்றி தெரிவித்துள்ளார்.