'தல'க்கனம் இல்லாத 'தல அஜித்'. தேவா பாராட்டு
- IndiaGlitz, [Friday,February 26 2016]
'தல' என்று ரசிகர்களால் அன்புடன் அழைக்கப்படும் அஜித்தின் நடிப்பை ரசித்து அவருக்கு ரசிகர்களாக மாறியவர்களை விட அவருடைய அன்புக்கும் குணத்திற்கும் கட்டுப்பட்டு ரசிகர்களாக மாறியவர்கள்தான் அதிகம் இருக்கும். அந்த அளவுக்கு மற்றவர்களிடம் அவர் காட்டும் நேசம், ரசிகர்களிடம் வைத்திருக்கும் பாசம் உண்மையானதாக இருந்து வருகிறது.
சமீபத்தில் நடிகர் ராதாரவி கூட தான் மற்ற எல்லா நடிகர்களையும் பெயர் சொல்லித்தான் அழைப்பேன் என்றும் அஜித்தை மட்டும் சார்' என்று மரியாதையுடன் அழைக்க ஒரே காரணம் அவருடைய சேவை செய்யும் மனப்பான்மை என்றும் கூறியிருந்தார்.
இந்நிலையில் பிரபல இசையமைப்பாளர் தேவா அவர்களும் அஜித் குறித்து கூறிய ஒரு கருத்து தற்போது வைரலாக பரவி வருகிறது. தேவா கூறியதாவது: தலக்கனமே இல்லாத ஒரு நடிகர் தல'தான். உலகம் முழுவதும் நான் இசைநிகழ்ச்சிகாக சுற்றுப்பயணம் செய்தபோது அஜித் மீது அவரது ரசிகர்கள் வெறித்தனமான அன்பு வைத்திருப்பதை நான் நேரில் பார்த்துள்ளேன். நான் நடத்திய பல இசை நிகழ்ச்சிகளில் ஏராளமான சீட்டுக்களில் அஜித் பாடலை பாடும்படி வேண்டுகோள் குவிந்துள்ளதை நான் பார்த்துள்ளேன்.
உலகம் முழுவதும் ரசிகர்கள் அவரது அன்புக்கு கட்டுப்பட்டுள்ளனர். அவரது அன்பும் சேவை செய்யும் மனப்பான்மைதான் அவரை இந்த அளவுக்கு பெரிய நிலைக்கு கொண்டு சென்றுள்ளது' என்று கூறியுள்ளார்.